La rakhe ïaka 14th National Voters Day ha Ri-Bhoi

Nongpoh, K’Lyngkot 27: Ki bor District jong ka Ri-Bhoi kila shim bynta ban rakhe ïaka 14th National Voters Day haka 25 tarik mynta u bnai ha ophis jong u Deputy Commissioner halor ka phang “Nothing like voting, I vote for sure” kaba dei ruh ka sngi mih pyrthei jong ka Election Commission of India hak ri.
Ha katei ka jingrakhe la wan ban shimbynta da ka kong B Ranee ADC ka Ri-Bhoi kum ka kongsan haka jingdonlang u Bah AL Myrthong Assistant Commissioner ba dei peit ïaka tnad elekshon, Bah BA Tiewla AERO bad kiwei kiwei ki ophisar.
Haba kren ha katei ka sngi naka liang ka kong B Ranee kum ka kongsan kala pynpaw ba ka 25 tarik u Kylla Lyngkot la ju rakhe ïaka National Voters Day kaba dei ka sngi mih pyrthei jong ka ECI haka ri haka 25 tarik Kylla Lyngkot 1950 bad ka thong ba hakhmat jong katei ka jingrakhe ka long ban pynshlur ïaki paidbah ba ki dei ban shimbynta haka hok thep vote ka jong ki khamtam kito ki samla kiba dang shu ioh thymmai ïaki EPIC ba kim dei ban pynlehnohei ïaka hok thep vote ka jong ki ban jied ïala ki jong ki nongmihkhmat.
Kala ong ruh ba ka ri India ka don bun tam ki nongthep vote kiba dang samla bad kyrpad ïaki ba kim dei ban pynlehnohei ïaka vote ka jong ki hynrei ban pyndonkam ïaka hok haka riti synshar paidbah ban jied ïaki nongmihkhmat.
Ha katei ka juh ka sngi naka liang ka ophis u Sub-Divisional Patharkmah (Civil) Sub-Division, Ri Bhoi District kila shim bynta ban rakhe ïaka National Voters Day da ka jingmareh marathon bad pynbud sa ka jingïalang kaba la pynlong ha Patharkhmah Government Higher Secondary School ha kaba u Bah MB Tongper Sub-Divisional Officer u la shim bynta kum u kongsan.