Jowai, Jylliew 21: Ïa ka ‘World Music Day’ la lakhe mynta ka sngi saitjaiñ 21 tarik u Jylliew ha District Library Auditorium, Mynthong, Jowai bala pynlong daka ophis u Deputy Commissioner ka West Jaiñtia Hills District.
Ha kane ka sngi la wan ban ïashim bynta lang da ki nongput nongtem na kylleng ka District kynthup naduh ka ELEV8 Choir, ka Magnificent obsession Jowai, ka Reggae Collective, Larger than 90, TSEVA Eniba War, Horealda Pasweth, Effie Vanroi Ryngkhlem, KER E bad ki nongjop haka Inter School Solo singing competition.
U Deputy Commissioner ka WJHD u Abhinav Kumar Singh, IAS haba ai jingkren ha kane ka sngi, ula kitbok kitrwiang ïa waroh ki nongwan ïashim bynta ha kane ka sngi, shuh shuh ula ong mynta ka sngi kam dei tang ka jingrakhe ïa ka jingrwai, hynrei ka dei ka jingwan ban ïasnohkti kum ki nongshong shnong haka imlang sahlang.
Shuh shuh ula ong naduh u khynnah rit, u samla wat haduh u riew rangbah ki sngewtynnad bha ïa ka jingrwai kaba lah ban pynsngewtynnad ïa ka jingmut jingpyrkhat, ka jingpynkymmaw ïa ki por ba mynshwa bad kan pyllait ruh na ki jingsngewsih ba bun jait.
U la ban jur halor ka jingriewspah ka District haka liang ka kolshor bad dei lyngba kine ki jingrwai tynrai ym tang ba ki ai ki jingpynbyrnia hynrei kin pynpaw pyrthei ïa ka jinglong tynrai ba kyrpang jong ka jaitbynriew.
Na ka liang u DC haba pynkut ïa ka jingkren da kaba ai khublei ïa baroh ki nongwan ïashim bynta ha kane ka sngi ba kyrpang bad pynlong ïa kane ka sngi kaba jop.
