Khliehriat, Jylliew 5: Ha ryngkat lang bad ka pyrthei baroh kawei, ka ophis jong u Deputy Commissioner ka East Jaiñtia Hills District mynta ka sngi ka la rakhe ïa ka sngi pynneh mariang ne ka World Environment Day 2025, kaba don ïa ka phang pdeng ‘iakhun pyrshah ïa ka jakhlia ba mih na ki plastik (“Beat Plastic Pollution”) ïa ka prokram la pynlong ha Conference Hall ha ophis u Deputy Commissioner.
Haba kren ha ka jingialang ka ADC East Jaiñtia Hills District, ka kong J. U Kharpuri ka la kren halor ka jingdonkam ka World Environment Day kaba phalang ïa ka jingitynnad ka mariang sawdong ha ka thain East Jaiñtia Hills District bad halor kane ka la kyntu ba donkam ban pynneh pynsah ïa ka mariang bad ki mar pohkhyndew watla hapdeng ka juk ba hap ban don ki karkhana bapher bapher.
Haba kren pat halor katei ka phangpdeng ka kong Kharpuri ka la kren halor ki jingma kiba mih na kaba pyndonkam palat ïa ki plastik bad kiwei kiwei ki jait tiar ki bym pyut kiba lah ban pynsniew dur ïa ka mariang, ka la kyntu ïa baroh ki paidbah ba ki dei ban pyrkhat bha halor ka jingkhuid jingsuba ka mariang ba lada ki pyndonkam ïa ki plastik ruh kim dei pat ban bret pathar hynrei ban saiñdur biang ïa kita ki plastik ha kawei pat ka rukom ba ju ong ka reuseable and recyclable items.
Kiba la ai jingkreh ki kynthup ruh u Research Officer (Planning), u bah S. Marwein, Assistant Research Officer (Planning), u Vesper Sangma, ka District Informatics Officer, NIC, East Jaiñtia Hills District, ka kong I. Rymbai bad ka District Programme Manager (DPM), District Rural Development Agency (DRDA), East Jaiñtia Hills District, ka kong Sanda Sutnga.
Hadien ka jingialang la pynlong ïa ka jingpynkhuid ïa ka phyllaw ka ophis Deputy Commissioner bad la pynlong ruh ïa ka jingthung dieng.
