La rakhe ïa ka World Breastfeeding Week bad ka World Population Day 2025 ha Khliehriat

Khliehriat, Nailar, 5: Ka ophis District Medical & Health Officer, East Jaiñtia Hills District ha ka sngi Baar ka la rakhe ïa ka World Breastfeeding Week 2025 halor ka phang, “Invest in Breastfeeding, Invest in the future” ha kajuh ka por la rakhe ruh ïa ka World Population Day 2025 halor ka phang, “Healthy Timing & Spacing Between Pregnancies for Planned Parenthood.”
Haba kren ha ka jingïalang u District Medical & Health Officer, East Jaiñtia Hills District, u Dr. D. Shylla u la pynkynmaw ïa baroh ki tnat treikam halor ka jingdonkam ban ai buiñ ïa ki khun kiba dang rit na ka bynta ka koit ka khiah jong ki khyllung kaba kynthup naduh ka koit ka khiah ha ka bor met, ka bor jingmut jingpyrkhat bad ha ka jingeh jingsan jong ki khyllung, ki khynnah bad ong ruh ba ka jingai buiñ ïa ki khyllung ka ïarap ruh ban pynduna ïa kiba bun ki jait jingpang kum ka pneumonia.
Haba kren ruh halor ka jingdonkam ka koit ka khiah jong ki longkmie bad ki khyllung, u Dr D.Shylla u kyntu ïa ki ASHA ba kin pynshlur ïa ki longkmie ha ki shnong ki thaw ban ai buiñ ïa ki khyllung ba dang rit kata naduh ba dang kha haduh ba kin da dap shi snem kyrta.
U Medical & Health Officer, uba dei ïa ki khyllung ki khynnah (Paediatrician), Khliehriat Civil Hospital, u Dr H. R.M Lamare u la kren shibun halor ka jingdonkam ban ai buiñ ïa ki khullung ba dang rit bad kren ruh halor ka jingmih na kaba ai dud ïa ki khyllung ha ki bilor dud bad kiwei kiwei ki rukon ai dud ïa ki khyllung, u la kren ruh halor ka jingdonkam ban pynsngewthuh ïa ki paidbah ha ki shnong ki thaw halor ka jingdonkam ka dud kmie ïa ki khyllung ba dang rit bad ban ai buiñ ïa ki khyllung kata haman la ka ar kynta hadien watla ha ka por mynmiet ruh.
Ha ka prokram ba ïadei bad ka World Breastfeeding Week 2025, baroh ki nongtrei jong ka tnat ka koit ka khiah hapoh ka jingïalam ka kong Pinky Lwait, ki la shim ïa ka jingkular, ne ka pledge kum ka jingpynshlur bad ban kyrshan ïa ka jingdonkam ka jingaibuiñ ïa ki khyllung lane ka breastfeeding ïa ki khyllung kiba dang rit.
Haba kren pat halor ka phang ba ïadei bad ka World Population Day, ka Community Health Officer (CHO), jong ka Khliehriat Civil Hospital, East Jaiñtia Hills District, ka kong R. Dhar ka la kren halor ka jingdonkam ban pynjlan khun lane ka Family Planning bad kren ruh halor ka jingdonkam u dawai kuli MALA -N pill, OCP & Chhaya pill ha kaba pynjlan khun.
Ha kane hi ka sngi kiba ai jingkren ki kren bad pynshai ruh halor ka World Hepatitis Day 2025 kaba don ka phangpdeng ‘Let’s Break it Down’ ïa kane ka prokram pat la pynlong da ka tnat National Viral Hepatitis Control Programme, ka National Health Mission (NHM), East Jaiñtia Hills District bad la pynlong ha Khliehriat East Community Hall, ha kaba la ïa don lang ruh u District Medical & Health Officer, East Jaiñtia Hills District, u Dr. D Shylla, u District Nodal Officer, Treatment Centre, National Viral Hepatitis Control Programme, East Jaiñtia Hills District, Dr. Dawanroy Nongpluh, ka District Immunization Officer (DIO), East Jaiñtia Hills District, ka Dr (Mrs) N.P Suchiang, u Medical & Health Officer, in-charge Opioid Substitution Therapy (OST), Centre, East Jaiñtia Hills District, u Dr J. Nongtdu, ka District Early Intervention Centre (DEIC) Manager, National Health Mission (NHM), East Jaiñtia Hills District, ka kong. D. Passah bad kiwei kiwei.
Ha kaba ïadei bad ka prokram World Hepatitis Day 2025, u District Medical & Health Officer, East Jaiñtia Hills District, Dr. D Shylla, u la kren halor ka jingdonkam ka koit ka khiah ha ka imlang ka sahlang bad ong ruh ba bun jait ki khniang jingpang ki lah ban rung sha ka met u briew dei namar ka jingbym shim khia ban sumar ïa ka met bad ka jingbym ju pynmlien ban lehkhuid ne ka unhygienic practices bad bynrap ruh ba ka jingpang hepatitis ka dei ka jingpang kaba lah ban sumar lyngba ka jingshimkhia jong kito kiba don ka kane ka jingshitom ha ka met bad u la kyntu ïa ki paidbah ba kin shim khia ban dih ïa ki dawai kumba la bthah da ki doctor ban long kiba koit ba khiah.
U District Nodal Officer, Treatment Centre, National Viral Hepatitis Control Programme, Dr Dawanroy Nongpluh, u la pynshai sha ki paidbah halor ka jingïoh ban rung ki khñiang jingpang hepatitis ha ka met u briew bad pynshai halor ka jingmih na kane ka jingpang Hepatitis B & C ha ka met u/ka briew, halor kane u la pynsgew ruh ïa ki lad ki kabu halor ka Free Screening na ka bynta kito kiba don ïa ka jingpang hepatitis.
U Medical & Health Officer, in-charge Opioid Substitution Therapy (OST), Centre, East Jaiñtia Hills District, u Dr J. Nongtdu, u la kren halor ka jingdonkam ban lap noh dang kloi ïa ka jingdon u khñiang jingpang hepatitis virus ha ka met u/ka briew ban ïoh ban sumar kham kloi ban ïoh ïa ka jingkoit ban lait na une u khñiang jingpang.
Kiba la ai jingkren ki kynthup ruh ka District Immunization Officer (DIO), East Jaiñtia Hills District, ka Dr (Mrs) N.P Suchiang, u District Programme Manager (DPM), National Health Mission (NHM), East Jaiñtia Hills District, u bah A. Dhar, ka District Early Intervention Centre (DEIC), National Health Mission (NHM), East Jaiñtia Hills District, ka kong D. Passah bad kiwei kiwei.