Jowai, Lber 22: Ïa ka ‘World Water Day’ ïa kaba la rakhe ha shityllup ka pyrthei mynta ka sngi 22 tarik u Lber ha Jowai la pynlong ïa kane ka prokram ban ‘tyngkai ïa ka um’ da ka ophis jong ka District Water and Sanitation Mission (DWSM) ha District Library Auditorium Mynthong Jowai, halor ka phang kaba ong ‘Groundwater: Making the invisible visible’.
Na ka liang u Additional Deputy Commissioner bah Alexander S. Mukhim haba ai jingkren ula pynsngew ba ka jingrakhie ïa kane ka sngi ka long kum ka dak ban pynkynmaw ïa iwei pa iwei ban sngewthuh halade halor ka jingkordor jong ka um ha kine ki sngi ba mynta bad ha ka juh ka por ka long ruh ka lad ban tip kumno ban kynshew ïa ka um slap.
Khnang ban ïoh khambun ka um dei ban ri sumar bha ïa ka mariang bad ban thung shibun ki dieng sha kylleng ki sawdong sawkun. Shuh shuh ula ong ba ka jingpyntreikam ïa ka skim jong ka sorkar pdeng ka JJM (Jal Jeewan Mission) ka long kawei na ki lad ban ïarap pynpoi ïa ka umbam haduh ki thliew ïing kaba ïarap ruh na ka jingkyrduh um.
Ha kane ka sngi la ïoh ruh ka jingkren na ka kong R. Kynjing Member Secretary DMASM kaba la batai shaphang ka jingdonkam jong ka umbam ha ka jingim ba manla ka sngi.
Shi bynta na kane ka prokram la ai jingbattai ruh ïa ki khynnah skul ba kin tip kham bniah ha kaba ïadei bad ki lad ki lynti kumno ban tyngkai ïa ka um na ka bynta ka lawei. Ha kane ka sngi ka ophis kala pynlong ruh ïaka jingïakop rwai tynrai bad ka jingïakop pyninam halor ka phang ‘save water it will save you’. Ha kaba la sam ruh ïa ki khusnam sha ki nongjop. Hashwa kane la ïoh ïa ki kyntien pdiang sngewbha da ka kong Zienovia Lyngdoh, District Project Manager (DPM).
