Jowai, Jylliew 25: Ïa ka ‘International Day Against Drug Abuse and Illicit Trafficking’ ne kaba la tip kum ka Nasha Mukt Bharat Abhiyaan la rakhe mynta ka sngi ha Thomas Jones Synod College, Jowai bala pynlong da ka Breakthrough De-Addiction and Rehabilitation Centre, KJP Synod Mihngi, ha ryngkat ka jingïarap pisa jong ka ophis District Social Welfare Officer Jowai.
Ha kane ka juh ka sngi ïa kum kane ka juh ka prokram la pynlong ha Chutwakhu Indoor Auditorium, Jowai da ka ophis u Superintendent of Police, West Jaiñtia Hills halor ka phang kaba ong “People First: Stop Stigma and Discrimination, Strengthen Prevention.”
Ka jingthmu ban pynlong ïa kane ka prokram ka long shi bynta ban pynsngewthuh halor ki jingsniew kiba mih na u Drug bad ka rukom pynïaid ïew ïa u kaba long beaiñ, ha kane ka sngi la kyntu ïa baroh ki nongwan sha ka prokram ba kin ieng ha ka nongrim ba skhem ban ïaleh pyrshah ïa une u jait jingsniew.
Kiba bun na ki nongkren ha kane ka sngi kila kyntu jur ïa ki samla ba kin kiar katba lah na kum une u jait jingdih khnang ba yn lah ban rat diengkhong shi syndon ïa u napoh ka imlang ka sahlang.
Ha Thomas Jones kiwei de kiba ai jingkren ki long u bah B. Kharmalki, General Secretary Meghalaya Users Forum uba la ban jur ïa u samla shynrang bad kynthei ban ïaid katba lah na une u jait jingdih Drug, katba u samla Hame Shaniah Suiam, International kick boxer and National Gold Medalist ula kren halor ka phang ‘ban jop ha ka jingim khlem u Drug’.
Ka District Social Welfare Officer Smt. J. Synnah kala kren shaphang ki rukom treikam jong ka Ministry of Social Justice and Empowerment kaba ïaleh ban ïakhun pyrshah ïa une u jait jingdih da kaba thaw ïa ka Nasha Mukta Society.
Ha kane ka sngi la pynbyrnia shuh shuh da ka jingïalehkai Skit ba la shim bynta da ka Mynthong Junior Christian Endeavour Society halor ka phang “People First: Stop Stigma and Discrimination, Strengthen Prevention.”
Na ka liang ka ophis District Social Welfare Officer kala pynlong ruh ïa ka jingïakop dro dur bad ïa ki khusnam la sam sha baroh ki nongjop, ha ka juh ka por ki nongwan sah kane ka prokram kila ïashim bynta lang ha ka ban pule ïa ka pledge bala lam khmat da ka DSWO kong J. Synnah.
Ïa ka jingïalang ha kane ka sngi la pynïaid da u Rev. R.K. Sutnga, la ïoh ruh ka jingkren lamphrang da Rev P.L Pakma, Executive Secretary KJP Mihngi. Katba ïa ki kyntien ai khublei la ïoh na u ma Shaphrang Dkhar, Co-ordinator Breakthrough Centre.
Ha Chuwakhu Indoor Auditorium, Jowai kila don haduh kumba 7 tylli ki skul kiba la wan ban ïashim bynta ha kane ka prokram ai jinghikai bala pynlong da ka ophis u Superintendent of Police, Jowai, ha ka jingïadonlang u Superintendent of Police, ma C. Syrti, MPS, Additional Superintendent of Police Dr. V.D S Rymbai, MPS, DSP (Law & Order/ Traffic), ïa ka jingïalang ka pynïaid da ka DSP kong C. W. Lyngdoh.
Na ka liang u SP ma Syrti ha ka jingkren u la pynsngew ïa ka jingktah jong u Drug ha ka jingim u briew, da kaba kyntu ïa ki khynnah skul ban kim dei ban pyndonkam ïa kum une u jait jingdih haba shem kino kino ki jingeh.
Ula pyntip ba ka ophis u Superintendent of Police kala dep ban pynlong ïa ki prokram ai jinghikai halor kane ka phang ‘Drug abuse and illicit trafficking’ ha kylleng ki bynta jong ka District.
