Khliehriat jylliew 26: Ka ophis jong ka District Social Welfare East Jaiñtia Hills District, mynta ka sngi ka la pynlong ïa ka prokram ba kyrpang kaba dei ka sngi pyrshah drok lane ka International Day against Drug Abuse and Illicit Trafficking, ïa ka prokram la pynlong ha Community Hall ha Umkiang.
Ka phangpdeng jong kane ka prokram ka dei ‘People First’ bad ban sangeh noh ïa ka jingpeit ibeiñ hynrei ban pynkhlaiñ ïa ka jingïada.
Kiba la ïa don lang ha kane ka prokram ki kynthup ka District Social Welfare Officer, ka kong R. Passah, u incharge jong ka Umkiang Patrolling Post, u Sub Inspector S. Buam, u Sub-Inspector, Ratacherra Check Post, u bah L. Syiem, ka kong R. Patlong , kaba dei ka Programme Manager jong ka Mih- myntdu Community Social Welfare Association (MCSWA), u Waheh Shnong Umkiang, u bah L.Pala bad kiwei kiwei.
Ka kong R.Pasah, ka la kren shaphang ka Nasha Mukt Bharat Abhiyaan kaba dei kawei na ki jingialap ne campaign haka ri India kaba la pynbna naduh u snem 2020 kaba dei kawei na ki prokram ban tehlakam ïa u drok, ka la ong ba donkam ruh ban don ka jingiatreilang bad kiwei kiwei ki tnat kumjuh ruh kiwei kiwei ki kynhun trei mon sngewbha lane ki society ki ban ai ka jingiatreilang bad ka tnat Social Welfare kumjuh ruh bad ka tnat pulit ban ïakhun pyrshah ïa u drok bad ka la bynrap da kaba ong ruh ba“Kum ki dkhot jong ka imlang ka sahlang ngi dei ban don ka jingkitkhlieh ban iada ban lait na u drok bad ruh ban long kum ki nonglam khmat (agent) ban wanrah ïa ka jingkylla ban dup poi sha ka thong, kata ban pynlong ïa ka imlang ka sahlang kaba lait na u drok”
U Sub Inspector, S. Buam, u la ai ka jingkren kaba bniah bad pynshai ha kaba ïadei bad u drok ba ki don ruh ki jait drok ba la prescribed da ki doctor ki bym dei kiba beaiñ bad ki drok kiba beaiñ pat ki dei kum ki Heroin, Opium, ki Ganja,ki Cocaine bad kiwei kiwei, u la batai bad pysnhai ruh halor ki aiñ Narcotic Drugs and Psychotropic Substances Act (NDPS) Act 1985, kaba dei ka aiñ kaba na ka bynta kito kiba khaïi ïa ki drok bad ki jait jingdih kiba pynbuaid, utei u heh pulit u la kyntu ïa ki khynnah bad ïa ki paidbah ba kin sngewbha ban ai ka jingiatreilang ban dup lah ban rat diengkhong ïa ka jingsniew u drok uba wanrah ruh ïa ka shong syier ha ka imlang ka sahlang bad kyntu ba lada ki lap ïa kino kino ki jait drok ne ganja ba kin sngewbha ban pyntip da kaba phone ha u Help Line Number 100/112.
Ka kong R. Patlong, ka la kren halor ka phangpdeng “People First: Stop Stigma and Discrimination, Strengthen Prevention.” Ka la ban jur ruh ïa baroh ba kin sngewbha ban ai ka jingaitreilang bad kumjuh ruh ban kyrshan lem kito ki briew kiba la ngat ha u drok ba kin ioh ïa ki lad jingsumar, ka la ong ruh ba donkam ban pynkhlaiñ shuh shuh ïa ki awareness prokram ban pysnsngewthuh shuh shuh ïa ki padibah shpang ka jingktah u drok, ha kajuh ka por ka la kyntu ïa ki khun samla ba kim dei ban ngop ha u drok bad ban long ruh kiba skhem jingmut ban ong EM ïa u drok kumjuh ruh ïa ka kyiad, ïa ka jingdih sikret bad kiwei kiwei ki jait jingbam jingdih ba sniew kum u duma namar kine ki lam sha ka jingkyrni.
Ha kane ka sngi ka tnat Social Welfare ka la pynlong ruh da ka jingiakop draw, ka jingiakop thoh poetry bad la sam ïa ki prize sha kito kiba jop, la pyni ruh ïa ka video lyngkot kaba pyni haduh katno ka jingktah u drok la pynlong ruh ïa ka jingiaid rally kaba naduh Umkiang Community Hall shaduh sha ïew Umkiang bad hadien kane ka ioh ïa ka jingkren ai khublei na Yohi Kyndait jong ka Meghalaya Aids control society.
