Shillong, Naiwieng 23:Mynta ka sngi U Blei, da ki phew hajar ngut ki paidbah kila ïatuid sha madan Weiking, Shillong ban rakhe ïa ka Seng Kut Snem kaba 126, ka jingrakhe kynmaw burom ïa ka jingseng ïa ka Seng Khasi ha u snem 1899
Ka Seng Kut Snem ka dei ka jingïakhih ïaksar kaba la sdang na ka bynta ban ïada ïa ka jingngeit tynrai, ka riti dustur bad jinglong tynrai jong kiba dang bat dang ksoh ïa ka niam Khasi paka.
Dei ha ka 12 tarik u Nailar 1899, 16 ngut ki samla Khasi kila thaw ïa ka Seng Khasi ban ïada ïa ka niam tynrai, ka kolshor kaba riewspah bad ïa ka ktien ka thylliej paka ha ka jingwan tynjuh kaba la wanrah da ki bor synshar phareng bad ki mishoneri Khristan.
Naduh katei, kane ka jingïakhih ïa ksar kala sdang ban ïohbor, kaba la pynrung ïa ka mynsiem jong ki samla Khasi ban sngewsarong ïa la jingriewspah bad ïa ka jingïoh pateng kaba kyrpang.
Mynta ka sngi, da ki phew hajar ngut ki paitbah kiba dang bat ïa la ka niam tynrai, kiba kynthup naduh ki samla, ki rangbah bad ki longkmie kiba la riam tynrai kila ïa mih ban ïaid ha surok jong ka nongbah ban pyni ïa la ka jingdon burom bad jinglong kordor jong ka niam bad ka kolshor u Khasi.
Kane ka jingïaid kjat kaba shongkun ka dei kaba la pyninam ïa ka kolshor bad ïa ka riti dutur kaba riewspah jong u Khasi lyngba ka tem ka put bad ka jingpynkhreh kyrpang ïa ki tabut kiba don ïa la ki khana bad ki jingpynpaw halor ka jingriewspah bad ka jingiphuh iphieng jong ka rukom im, kiba dang bat dang ksoh ïa ka niam tynrai.
Ka “Ïaid Pyni Riti” kala sdang na Madan Iewrynghep bad la pynkut pat ïa kane ka jingïaid ha Madan Weiking ha Jaiaw, ha kaba la ïoh ïa ki jingshad tynrai bad la buh jingduwai kyrpang ruh ha kane ka sngi kaba kyrpang.
