Jowai, K’Lyngkot 27: Kum ka dak ka jingïashim bynta lang, ïa ka Republic Day kaba 77 la pynlong ruh ha Jowai ha madan ïalehkai Jrisaleiñ, Chuwakhu, Jowai, ha kaba u MLA ma Kyrmen Shylla uba dei Myntri barim ka sorkar jylla ula pynher ïa ka lama ka ri bad shim ïa ka salute Rashtriya ïa ki 17 tylli ki Contingent kiba kynthup ïa ki pulit ka District, ka Kiang Nangbah Government College NCC Unit, Jowai, Thomas Jones Synod College NCC, Government Girls Higher Secondary School, Jowai NCC, Meghalaya Bharat Scout and Guides, Jowai lem bad ki 12 tylli ki Skul.
Hadien kane la don sa ka jingpyni ïa ki “tableau” da ki tnad sorkar kiba la pyni ïa ki skhim treikam bapher bapher jong ki.
Ha ka jingïaid march pass ka JNV Mukhla ka la ïoh ïa ka nam ba nyngkong bud sa ka Government Boys Higher Secondary School, Jowai haka kyrdan ba ar bad ka Tome Memorial Higher Secondary School, Mooralong, Jowai ha ka kyrdan ba lai.
Ki la don haduh 13 tylli ki tnad treikam kiba la ïashim bynta ha ka jingïakop tableau. Ka District Commerce and Industries Centre (DCIC), WJHD Jowai kala ïoh ïa ka kyrdan kaba nyngkong, ka District Prison and Correctional Home, WJHD, Jowai ka la ïoh ïa ka khusnam kaba ar bad ka Meghalaya State Skill Development Society, WJHD, Jowai ha ka kyrdan kaba lai.
Ha kane ka sngi la sam ruh ïa ki khusnam ha ryngkat ka song pisa bad ka syrnot sha ki ar ngut kiba la trei shitom ha ka kam shi bynta na ka World Population Fortnight 2025. Ka Kong Rijoy Lapasam, ANM na Mowkaiaw Sub-Centre ka la ïoh ïa ka khusnam halor ka rukom ai jingtip sha ki longkmie ha ka por ba kha khun bad ka jingai jingtip ba biang por sha ka tnad ka koit ka khiah, katba ïa ka Kong Lama Muroh, ASHA na Khliehtyrshi NSC, la ithuh halor ka kam ‘Saas-Bahu-Pati Sammelan activities kaba hap hapoh ka Mission Parivar Vikas (MPV).
La pynphuh pynphieng shuh shuh ïa kane ka sngi da ki jingrwai, ki jingshad, ka jingpynher dingkum (fire balloon) da ka Dorbar Shnong Chilliang Raij bad ka jingleit ai sngewbha sha ki khynnah ka Children’s Home.
Katba ha Shangpung ruh la rakhe ïa ka Republic Day kaba 77 ha madan Hula Moosyiem, Shangpung, Laskein C&RD Block ha kaba ka Kong Santa Mary Shylla, MLA kala pynher ïa ka lama ri bad shim ruh ïa ka salute ïa ki 9 tylli ki kynhun contingent.
Ha ka jingïaid march pass la wan ba nyngkong da ka Seiñ Raij Upper Primary School, Khliehrangnah, ka Dolini Chullet Memorial Secondary School ha ka kyrdan ba ar bad ka Lummuro Higher Secondary School ha ka kyrdan ba lai.
La pynphuh ïa ka jingrakhe lehkmen ïa kane ka sngi da ki jingrwai ieid Ri bad ka jingshad tynrai ba la shim bynta da ki samla pule.
