Jowai, Naiwieng, 11: Ki bor synshar District, West Jaintia Hills ryngkat ka jingïatreilang bad ka ophis jong u District Sports Officer ki la pynlong ïa ka prokram District Level mynta ka sngi ha Chutwakhu Indoor Sports Hall, Chutwakhu, Jowai ban kynmaw burom ïa ka jingdap 150 snem jong ka sngi kha u Sardar Vallabhai Patel. Ka Sub-Division Ophisar (Sadar), Jowai, ka Vevotolu Kezo, IAS, ka la long ka Kongsan ha kane ka sngi.
U Bah K. Passah, uba long u District Sports Officer ka Jowai, u Micheal Mate, Deputy Director My Bharat (NYK), ka (Dr.) Wa-i-sa Sumer, District School Education Officer, Jowai bad kiwei ki heh ki haiñ bad ki riew rangbah jong ka District kila ïadon lang ha kane ka jingrakhe.
Mynta u snem ka dei ka jingdap ba 150 snem ka sngikha jong u Sardar Vallabhbhai Patel uba la ju kynmaw ieid kum u Iron Man jong ka Ri India. U Sardar Vallabhai Patel u la long u nongsynshar ri uba don ka jingïohi jngai bad u nongshna ïa ka jingïatylli jong ka jaitbynriew. Haba ai jingkren ha kane ka jingïalang, ka ophisar ka Sub-Divisional (Sadar) Jowai, ka Smt. Vevotolu Kezo, ka la ong ba ïa ka sngi ïatylli jong ka Ri (Rashtriya Ekta Diwas) la rakhe ha ka sngi kha jong u Sardar Vallabhai Patel, u Iron Man jong ka ri India, ban burom ïa ka bynta ba kongsan jong u ha kaba pynïatylli ïa ki 562 tylli ki hima hadien ba la ïoh ïa ka jinglaitluid. Ka la ban jur ba ka jingïaid paidbah kaba la pynlong kham mynshwa kam dei tang ka dak hynrei ka jingpynkynmaw ïa ka jingdonkam jong ka jingïatylli ka jaitbynriew bad ka ri hi baroh kawei (Ek Bharat Shreshtha Bharat).
Ka Kezo ka la pynpaw ba ïa kane ka jingrakhe la rakhe ha kylleng ki Distrik ryngkat ki prokram kiba pyni ïa ka jingïatylli jong ka India hapdeng ka jingiapher. Ka la ai khublei ïa ki nongïashim bynta na ka bynta ki jingshad ba itynnad jong ki, kiba pynpaw ïa ka kolshor ba riewspah jong ka thaiñ. Ka la ai ka jingsngewnguh ïa baroh ki riew shimet bad ki seng kynthup ïa u District Sports Officer bad ki tnad treikam bapher bapher jong ka District kiba la pynlong ïa kane ka prokram kaba jop.
U Micheal Mate, Deputy Director My Bharat (NYK) u la pynpaw ïa ka jingthmu jong kane ka prokram bad u la kdew ba kane ka jingrakhe kan bteng haduh ka 25 tarik u Naiwieng, 2025. U la ai khublei ïa baroh ki nongpynïaid, ki samla pule bad ki bor pynïaid Distrik, ka ophis u District Sports Officer, kiba la lah ban pynlong ïa ka prokram kaba don jingmut bad kaba ïadei bha.
U la kyntu ïa ki samla kiba don ha kane ka sngi ba kin ïoh mynsiem na ka jingim bad ka jingjop jong u Sardar Vallabhai Patel, kum u nongshna ïa ka jingïatylli bad jingïatylli jong ka ri India. U la pynpaw ka jingkyrmen ba ki samla kin bud ia ka nuksa jong u Sardar Patel ha ka jinglong nongialam, ka jingaiti lut bad ka jingshakri ïa ka jaitbynriew.
Kham ha shwa ïa kane ka la don ka jingïaid rally kaba la sdang na Kiang Nangbah Govt. College shaduh sha Chutwakhu Indoor Hall, ïa kaba la kaweh lama da ka kongsan ka Vevotolu Kezo.
