La rakhe ïa ka lyngkhuh sngikha ba 139 u Rev JJM Nichols Roy, u Kpa ka 6th Schedule

Shillong, Jylliew : Ka Rev. JJM Nichols Roy Memorial Committee ka la pynlong ïa ka jingïalang ban kynmaw burom ïa ka lyngkhuh sngikha kaba 139 u Rev. JJM Nichols Roy ha ka 12 tarik mynta u bnai.
Ha kane ka sngi la sam ruh ïa ka khusnam sha ki laingut ki samla pule jong ka Rev JJM Nichols Roy College kiba la ioh bun mark eh ha ka BA da I Prof (Mrs) Badaplin Wat Padma Shri kum I Kongsan.Ha ka jingkren I Kongsan i la pynkynmaw ba u Rev Nichols Roy u la long uwei na ki nongïalam ba radbah jong ka jaidbynriew Khasi Jaiñtia bad uba la noh synñiang shikdatdei eh ha ka imlang ka sahlang bad ruh ha ka jingshakri ïa ka jaidbynriew kum u Minister Khristan bad kum u riewshemphang bad u riew sngewthuh.
Kum u dkhot ne member jong ka Constituent Assembly u la ïoh lad ban pynrung ïa ka 6th Schedule hapoh ka constitution jong ka Ri India, kaba la long shisha ka jingïada ïa ki trai shnong ne ki Tribal ha ka thaiñ shatei lammihngi (North East) hi baroh kawei kaba kynthup ïa ka jingïada ïa ki jaka puta bad kiwei kiwei ki lad jingïada.
Na ka liang u president ka Governing Body jong ka Rev JJM Nichols Roy College, u Rev Dr AC Moore ha ka jingkren u la ong ba u Rev Nichols Roy u don ka jingngeit kaba skhem kum u nongïalam Khristan uba ngeit ha u Jisu Khrist bad uba ïai pynpaw ïa ka jingieit jong U Blei ïa ka Ri Khasi Jaiñtia.U la ong ruh ba ka pateng ba mynta ki ngeit ha u Jisu hynrei ki briew kim ïohi ïa u Jisu ha ka jingim jong ki.
Kiwei pat kiba la aijingkren ha kane ka sngi ki kynthup ïa u Bah Ransom Sutnga, Chairman, Bah HS Suting Secretary JJM Nichols Roy Memorial Committee.
Na ka liang u Bah Suting ha ka jingkren u la pynkynmaw ba ka sorkar ha ka snem 1969 kum ka dak ka jingñiewkor bad burom ia u Rev JJM Nichols Roy ka la ai kawei ka madan ban pynsahnam bad burom ïa ka kyrteng jong u ha ka Plot No.1 kaba markhap bad ka Govt Boys Secondary School kaba hajan Madan Student, Jaiaw ba la tip kum ka Madan Kyndong.
Kane ka Committee ha ki snem kiba mynshuwa ka la ju ai khusnam ïa ki samla pule kiba pass bha ha ka Science bad Arts stream kum ka jingpynshlur ïa ki samla pule ba kin nangkiew shaphrang ha ki jingpule jong ki.
U Chairman bad ki dkhot ba nyngkong jong kane ka Committee ki long u Prof GG Swell, Dy. Speaker Lok Sabha, Vice President PR Kyndiah, ki dkhot Bah BB Lyngdoh, DD Pugh, SDD Nichols Roy, JN Bawri, Kong EN Shullai, Kong Q. Rynjah bad AK Shahoo.
Shuh shuh kiwei pat kiba la ia don lang ha kane ka jingïalang ki long u Rev BR Sohkhia, Rev. R Imiong, Principal ka Rev JJM Nichols Roy College, ki nonghikai bad ki samla pule.
La kha ïa u Rev JJM Nichols Roy ha ka 12 tarik Jylliew 1884 ha Shella. U dei u khun ksiew jong u Tirot Sing Syiem. Hadien ba u la pass ïa ka Entrance Examination na ka Govt Boys High School u la leit pule pat sha Kolkata ha Scottish College. Ynda u la dep pule u la wanphai pat sha la ka jong ka Ri bad u la long uwei na ki riewkhraw jong ka jaidbynriew.Kane ka long katkum u kyrwoh lyngba u Bah HS Suting, Secretary ka Committee.