La rakhe ïa ka Lyngkhuh Snem SngiKha ba 78 jong u P.A Sangma bad lyngkhuh snem ba 13 ka NPP

Williamnagar, Nailur 01: Ka sor Williamnagar kala shongshit ha ka jingrakhe ba da ki hajar ngut kila ialum ha ka madan jongka Rongrenggre ban rakhe ïa ka lyngkhuh sngikha kaba 78 jong u (L) P.A. Sangma bad ïa ka jingdap 13 snem jong ka seng National People’s Party (NPP).
Ha kane ka jingïalang la wan ban ïashimbynta da ki briew na kylleng ka thaiñ shatei lammihngi bad na kiwei kiwei ki jylla ban ai burom ïa u nongïalam uba la khlad noh.
Ha kane ka sngi la sdang ïa ka prokram da kaba pynlong ia ka jingïakob rwai, la pyllait paidbah ïa ka kot lyngkdop ne ka coffee table book bad ka jingplie ïa ka P.A. Sangma Photo Gallery.
Hadien kane la pynlong ïa ka jingïalang ha ka por 1 baje mynsngi da kaba rwai ïa ka jingrwai Oh Ang Aman Asong kaba la thaw da u Beston Momin, kaba la pynwandur thymmai biang da ka kynhun tem ba pawnam ka rilum Garo ka Nokpante— ïa kaba la shim ba kadei ka ‘Anthem’ jong ka NPP ha rilum Garo.
Kala don ka jingbuh syntiew kaba la ïalam da ka kurim jong u (L) PA Sangma ka Soradini K. Sangma, ha ryngkat ka jingdonlang u Nongïalam ba ha khlieh ka NPP u Conrad K Sangma uba long ruh u Myntri Rangbah ka jylla u Conrad K. Sangma bad kiwei kiwei ki heh ki haiñ.
La ai ia ka jingkren pdiang sngewbha da u myntri ka sorkar jylla u Marcuise N. Marak.
Ha kane ka sngi, palat 300 ngut ki dkhot na ki seng saiñ pyrthei ki bapher bapher kiba la wan pynïasoh sha ka seng NPP kila shah pynkup burom, katto katne ki nongïalehkai na rilum Garo kila ïoh pdiang ïa ka khusnam P.A. Sangma Achievers’ Award. Nalor kane la ai ruh ïa ka khusnam kaba kyrpang ïa ka Soradini K. Sangma bad ïa kiwei kiwei kiba kynthup ïa Sonelal Kol, N.K. Gauri bad Breston Momin, kiba la leh ïa ka bynta kaba khraw ha kaban pynwandur ïa ka seng ha ki por ba la thaw ia ka.
Kane ka jingrakhe kadei ruh ka dak jong ka jingplie ïa ka P.A. Sangma Museum Arena da u Myntri Sorkar u Marcuise Marak bad ha kane ka museum, la pyninam shaphang ka jingim, ka nongrim bad ka jingshemphang jong u nongïalam ba la khlad noh, da ka jingthmu ban ai mynsiem ïa ki samla bad ïa kiba la heh la san ha ka rta.
U Myntri Rangbah u Conrad K. Sangma kham hadien, ula leit ban jurip ïa katei ka museum bad ong ba kadei ka jingai kynmaw burom kaba khraw ïa u kpa jongu ha ka jingïaid lynti kaba sahnam ka jongu.
Bun ngut ki heh ki haiñ kila ai jingkren ha katei ka jingïalang bad pynkynmaw ïa ka por kiba la leit bad iï ka jingkhraw ka nam jong u PA Sangma.
UThangwang Wangham, State President ka Arunachal Pradesh NPP, ula ong ba u PA Sangma udei u nongïalam ba shisha jong ka thaiñ shatei lammihngi bad ula kyntu ba dei ban nang pynkhlaiñ ïa ka seng.
U MP ka Rajya Sabha u Dr W.R. Kharluki ula pynkynmaw ïa ka jingsngewkhia u PA Sangma na ka bynta ka bha ka miat jong ki paidbah bad ka jingïadei kaba ïajan bad pulit kiba ai jingïada ïa u.
U Symbud Myntri Rangbah ka jylla u Bah Sniawbhalang Dhar ula pynpaw ïa ka jingbynñiaw ba ym shim la ïoh ïa ka lad ban ïatrei ryngkat bad u PA Sangma hynrei ula ïaroh pat ïa ka jingïohi jngai ka jongu kaba ïai bteng ban pynwandur ïa ka jylla Meghalaya.
U Lamphang ka Meghalaya Legislative Assembly, u Thomas A. Sangma, ula pynpaw ba u P.A. Sangma ula trei borbah khlem shongthait na ka bynta ki jaidbynriew riewlum, kiba dang bat ïa la ka tynrai bad ki jaidbynriew kiba la shah ïehbeiñ.
U National Working President ka NPP, u James K. Sangma, ula pynpaw ïa ka jingsngewnguh ïa ki nongïalam na kylleng ka thaiñ kiba la wan ban ïadonlang bad ula ong ba kane kadei ka jingai burom kaba kordor tam ïa u nongïalam.
U Myntri Rangbah u Conrad K. Sangma, ula pynpaw ïa ka jingshem shimet ka jongu ha ka jingleit synran ïa la u Kpa ha ka por ba ki dang sdang ban thaw ïa ka seng hapoh ka jylla Manipur. Ula pynkynmaw kumno ba u kpa jongu u don ïa ka jingngeit kaba skhem, wat haba ula sakhi ïa ka jingthylli jong ka jaka pynlong jingïalang, ula pynkylla ïa ka jingtynjuh sha ka kabu bah.
“U long u briew u bym shah ktah eiei ha ki jingtynjuh bad u dap kyrhai da ka jingmut kaba bha” ong u Conrad bad ka ïaroh ïa ka jinglong nongïalam u kpa ba ka seng NPP kala kiew kumba ka long mynta.
Haba kren pynkut u Conrad ula pynpaw ïa ka jingmut jong ka kyrteng u kpa, Purno kaba mut “pyndep pura” bad ong, “Hooid ula im ïa ka jingim kaba pura bad kaba don jingmut”.