La rakhe ïa ka lyngkhuh snem sngi iap u Tirot Sing mynta ka sngi ha Nongkhlaw

Mairang, Naitung 16: Namar ba ka lyngkhuh sngi iap kaba 187 jong u khlur ïaleh laitluid ka Ri, U Tirot Sing Syiem, ka hap ha ka Sngi U Blei mynta u snem, kumta la ïoh ban kynmaw burom ïa kane ka sngi khraw ha ka rukom kaba ishongkun mynta ka sngi ha ka prokram ba la pynlong ha Madan Nongrah, Nongkhlaw, Eastern West Khasi Hills District.
Ha kane ka prokram ba la pynlong da ka Tirot Sing Syiemlieh Death Anniversary Committee, Hima Nongkhlaw ha ryngkat ka jingïatreilang jong ka Centre for Historical Research, Synod College, Shillong bad ka tnad Arts and Culture jong ka sorkar jylla.
Ha kane ka sngi la wan ban sakhi da U MP ka Rajya Sabha ka jylla Meghalaya, U Dr. W. R. Kharlukhi uba la leit kum u kongsan ha ka jingdon ryngkat jong iwei na ki nonghikai ka History Department jong ka skulbah NEHU, Prof. Amena N. Passah, U Additional Deputy Commissioner ka Eastern West Khasi Hills District, u Bah V. Swer.
Ha kane ka sngi la don lang ruh u Deputy Superintendent of Police (Headquarters) ka Eastern West Khasi Hills District, U Bah H. Kharkongor, U Syiem Khynnah ka Hima Nongkhlaw, U Bah K. M. Syiemlieh, U Principal ka Synod College, Shillong, U Dr. R. M Lyngdoh, ki nongtrei sorkar, ki dkhot jong ka Kur Syiemlieh, ki nongïalam shnong, ki nonghikai, ki khynnah pule bad ki paidbah ka dong ka thaiñ.
Ha ka jingkren jong u kum u kongsan, U MP ka Rajya Sabha, U Dr. W.R Kharlukhi, haba pynpaw ïa ka jingkmen jong u ban ïadon bynta bad ka sngi kynmaw burom ïaka lyngkhuh sngi iap jong U Tirot Sing Syiem, u la ong ba kum shibynta jong ka jingrakhe ïa ka Azadi ka Amrit Mahotsav kaba long ka jingrakhe jong ka jingdap 75 snem ka jingïoh laitluid ka Ri India.
Ka Sorkar Pdeng ka la buh ïa thup jong ki 115 ngut ki riew ïaleh laitluid ka Ri India ha kaba la kynthup ruh ïa ka kyrteng jong u riewkhraw ialeh laitluid ka Ri Khasi, U Tirot Sing Syiem nalor kiwei pat ki riewïaleh laitluid na kiwei pat ki jylla ka Ri India.
Haba kren halor u synniang ba radbah ba U Tirot Sing Syiem u la noh, U Dr. Kharlukhi u la ong ba watla une u riewshlur u la khlad noh 187 snem mynshwa, hynrei ka kyrteng bad ka nam jong u ka dang ïai im bad ïaisah haduh kine ki sngi kiba mynta bad ïa ka jingshlur jong u la rakhe bad kynmaw burom haduh kine ki sngi ym tang ha shnong Nongkhlaw hynrei ha baroh kawei ka jylla Meghalaya.
Ha ka jingkren jong u, u Dr. Kharlukhi u la ban ruh halor ka jinglenlade jong U Tirot Sing Syiem na ka bynta ka bit ka biang jong ki pateng ki ban wan bad u la khot la wer ruh ïa ki paidbah kiba la ïadon ha kane ka sngi ban ring jingmut na ka mynsiem ïakhun jong u Tirot Sing Syiem ha ka jingim jongki kaba man ka sngi.
Haba kren halor ka jingieid thep mynsiem jong u Tirot Sing Syiem ïa la ka Ri bad ïa ki paidbah nongshongshnong jong ka, u kongsan u la khot ïa baroh kiba la sakhi ïa kane ka sngi kynmaw burom ïa ka lyngkhuh sngi iap jong U Tirot Sing Syiem ba kin bud nuksa bad ringjingmut na ka mynsiem ieid ri jong u Tirot Sing Syiem ha ka jingïakhun jong u pyrshah ïa ki bor ka sorkar phareng.
I nonghikai jong ka History Department ka skulbah NEHU, Prof. Amena. N Passah, ha ka jingkren jong i, i la kren shaphang ka jingïaid lynti jong U Syiem Tirot Sing kum u riewïaleh laitluid ka Ri haduh ka sngi ba un da khlad noh na ka sla pyrthei ha ka 17 tarik u Naitung jong ka snem 1835.
Ha kane ka prokram, na ka liang jong ka Tirot Sing Syiemlieh Death Anniversary Committee, Hima Nongkhlaw ka la ïoh ban ai ruh ïa ka Memorandum sha u Kongsan ha kaba la buh jingkyrpad ban buh ïa u motdur ba shirynieng jong u Tirot Sing Syiem ha Nongkhlaw bad ban shna ruh ïa ka Children’s Park kum shibynta ban pynsah nam ïa une u riewkhraw ka jylla.
La pynphuh pynphieng ïa kane ka sngi da ki jingrwai bad jingshad tynrai na ki riew donsap kiba kynthup ïa ki khynnah pule bad ki khun samla ka thaiñ. Hashwa jong ka prokram ha Madan Nongrah, u Kongsan bad ki kynrem ki lyndan ki la ïoh ban leit ban buh syntiew ha u motdur jong u Tirot Sing Syiem uba don ha Khasi Patriotic Home, Nongkhlaw.