Amlarem, K’lyngkot 21: Ka ophis Sub-Divisional Officer (Civil), Amlarem Sub-Division, kala rakhe ïa ka 54th Meghalaya Day 2026 ha ka jingïalang kaba la long haka Conference Hall jong ka Ophis SDO (C), Amlarem West Jaiñtia Hills District.
Ha kane ka jingïalang la wan ban ïashim bynta da baroh ki Sub-Divisional Heads jong ka Amlarem Sub-Division ha ryngkat ki ophisar, ki nongtrei bad ki nongshah khot sngewbha, kiba la pynpaw ïa ka nongrim jong ka jingïatylli haduh ban pynlong ïa ka jylla Meghalaya.
Ïa ka jingïalang la pynïaid da Dr. Kavery Rabha, MCS, Assistant Commissioner, Amlarem, kaba la pynkynmaw ïa ka jingïakhun jong ki nongïalam ka Hill State Movement, kiba don shisha ka jingïatylli bad ka jingïatreilang ban pynskhem ïa ka jingïaid lynti jong ka jylla.
U Dr. Treemmi Lamare, Lecturer, Dept. of Political Science, Kiang Nangbah Government College, Jowai bad Post-Doctoral Fellow, IIT Delhi, ha ka jingkren ula batai ïa ka jingïaid lynti ka jylla Meghalaya naduh ka por ba ka jylla ka dang don hapoh ka Assam bad haduh ka jylla ka la ïoh ïa ka jylla haka 21 tarik Kyllalyngkot 1972. U la pynpaw ruh ïa ka jingdonkam jong ka Sixth Schedule bad ka jingïakhun jong ka Hill State Movement bad pynpaw ba ka jylla Meghalaya kala ïoh ïaka jylla jong ka da ka lynti jong ka jingïakhun kaba jai jai.
Ka Sub-Divisional Officer (Civil), Amlarem Sub-Division, ha ka jingkren jong ka, ka la ong ba ka jylla Meghalaya ka dei ka jylla kaba riewspah ha ki jinglong ka mariang, ka jaitbynriew bad ka jingïadei hapdeng ki shnong ki thaw. Ka la kdew ruh ïa ka Meghalayan Age bad ïa ka jingthmu jong ka sorkar lyngba ka Mission 10 ban pynlong ïa ka jylla Meghalaya kum kawei na ki 10 tylli ki jylla kiba bha tam ha ka ri India ha u snem 2032, katkum ka jingthmu jong ka Viksit Bharat 2047.
Katba ïa ki kyntien ai khublei la ïoh na u bah Anthony Rema, Inspector of Excise, Amlarem Civil Sub-Division.
