La rakhe ïa ka ‘International Day against Drug Abuse and illicit trafficking’ ha Jowai

Jowai, Jylliew 26: Ka District Social Welfare Officer, West Jaiñtia Hill bad ka Jowai City YMCA mynta ka sngi 26 tarik kila rakhe ïa ka ‘International day against drug abuse and illicit trafficking’. shi bynta ban pynsngewthuh paidbah halor ki jingsniew kiba mih na u drug, kumjuh ka jinghikai halor ka koit ka khiah bad ban lait na kaba dkhat jubor ïa la ka jingim.
Ïa kane ka jingïalang bala pynlong ha District Library Auditorium, Mynthong halor ka phang “The Evidence is Clear Invest in Prevention”. Ha kaba la wan ban donlang da u Deputy Commissioner bah B. S. Sohliya, IAS, ma O. Lamin, MDC kiba la ai jingkren shaphang kane ka sngi bad ban pynsngewthuh sha ki khun samla ka District halor ki jingsniew bad ki jingktah jong u Drug. Ha ka juh ka por kila buh ruh ka jingkyntu ïa ki khun samla ban kiar katba lad na kino kino ki jingdih ba sniew.
Ka District Social Welfare Officer, kong R Passah kala pyntip hapoh une u bnai Jylliew kila dep ban pynlong shibun ki prokram ai jinghikai shaphang u Drug ha kylleng ki shnong bad ki dong bapher bapher hapoh ka District.
Na ka liang ka ophis DSWO kala dep pynlong ruh ïa ka jingïakop dro dur naka bynta ki khynnah skul bad la sam ruh ïa ki khusnam sha ki nongjop. Ïa ka kyrdan ba nyngkong bad ba ar la ïoh da ka Durka Passah bad Kyntu Lang-I-O Satein naka Seiñraij Higher Secondary School, katba ka kyrdan balai la ïoh da Eldora Rymbai naka Jaiñtia Secondary School, Jowai.
Ha kane ka prokram la ïoh jinghikai ruh ban lait na ka jingdkhat jubor ïa la ka jingim bad ka jingduna ha ka bor pyrkhat bala batai bniah da ki riew shemphang naduh u Keshav Laba, Counselor cum Centre in charge ODIC, Kripa Foundation Shillong, Dr. Dida Khonglah (MD Psych) Psychiatrist SAN-KER, Shillong bad u Eborwan mi oo Majaw.
Kiwei de kiba wan sha ka prokram ki long u ma L. Suchen, Skill Development Officer, ma S. Thabah, Regional Secretary YMCA, Rev R. Khonglah bad Tbn. John R. Shullai.
Shi bynta na ka jingrakhe ïa kane ka sngi ‘International day against drug abuse and illicit trafficking’ ka District Legal Service Authority, West Jaiñtia Hill kala pynlong ïaka juh ka prokram ai jinghikai ha Thomas Jones Synod College, ban ai jingtip ba kham bniah sha ki samla pule bad kumjuh shaphang ki kyndon aiñ kiba long pyrshah bad u Drug.