La pynwai ka High Court ïa ka mukotduma Roster System tangba dang khang ban thung kam

Shillong, Jymmang 11 : Ka ïing Bishar ba donburom jongka jylla ka Meghalaya High Court mynta ka sngi ka la pynwai noh ïa ka mukotduma PIL halor ka Roster System hadien ba ka sorkar ka la rai ban pyntreikam noh ia ka Roster System kat kum ka Reservation Policy, tangba ha kaba ïadei bad ka jingpynsangeh thungkam, kane kan dang bteng beit hapoh ka jylla.
Ha ka hukum ba la pynmih la ong “ Namar ba la rai ban pyntreikam noh ïa ka Roster System da ka sorkar kat kum ka Reservation Policy kumta la pynwai noh ïa kane ka mukotduma tangba ka jingpynsangeh ban thungkam kan dang bteng beit haka jylla Meghalaya”.
Ka sorkar kam shym la pyntreikam ïa ka Roster System kat kum ka Reservation Policy naduh ba la ïoh ïa ka jylla ba pura kata 50 snem mynta lap ka ïing bishar lyngba ki nongbishar ka Division Bench u Chief Justice Sanjib Banerjee bad u Justice W.Diengdoh.
Ha ka jingbishar mynta ka sngi u Advocate General u la aiti ïa ka kopi jongka memorandum ba la rai da ka sorkar ha ka 10 tarik ban pyntreikam noh ïa ka Roster System hapoh ka jylla ha baroh ki jingthung kam jong ki tnad sorkar bapher bapher da kaba pynshong nongrim kat kum ka Reservation Policy.
Ka ïing bishar ka lap ruh ba dang don bun kiei kiei kiba hap ban pynbeit ha ka memorandum ha kaba dei ruh ban kynthup ne buh bhah kyrpang ïa kito ki briew kiba don jingduna dkhot met ruh.
Kane ka jingpynsangeh thung kam kan bteng tad haduh ban da dep pynbeit lut nadong shadong ha man la kawei pa kawei ka post kaba hap hapoh ka Reservation Policy bad dei hadien ba la dep pynbeit bad pynthikna ïa kiba la dep thung lypa ba sa lah ban bteng biang ïa ka jingthung kam ha ka jylla ha ki post kiba dang thylli ne dang lait. Ka ïing bishar ka la pynshai ruh ba ka Gradition List kam hap ha ka Roster System namar ia kane la bishar kat kum ka jingtbit bad dei hok ban ïoh.