La pynskhem ïa ki nongkitkam thymmai ka Hynñiew Trep Meghalaya Ex-Services League, Ri-Bhoi Unit

Nongpoh, Jymmang 19 : Ka kynhun ki shipai ba la shongthait, hapoh ka shatri jong ka Hynñiew Trep Meghalaya Ex-Services League, mynta ka sngi ka la pynthymmai bad pynskhem ïa ki nongkitkam jong ka Ri-Bhoi Unit na bynta ka samoi treikam 2025 haduh 2028 haka jingïalang kaba la pynlong ha Auditorium Hall ha Marngar, bad la sakhi da ka jingdonlang ki shipai ba la shongthait, ki ki lok bad ki longïing jong ki shipai ba la khlad.
Ki nongkitkam ka Ri-Bhoi Unit ba la pynskhem ki kynthup ïa u Bah S. Thangkhiew kum u President bad u Bah Niren Pambah kum u General Secretary, nalor kiwei pat ki nongkitkam kiba hakhmat bad ïa kitei ki nongkitkam la wan ban pynskhem da u President ka Central Body, Bah S. Syiemlieh, ryngkat bad u Bah B. Marchyang.
Haba kren sha katei ka jingïalang, ki nongïalam ka Ex-Services League ki la ong ba ka jingpynkha ïa ki Unit ha man ki District ka long ban pynkhlaiñ shuh shuh ïa ka rukom treikam jong ka Central Body. Kane ka kynhun, kaba kynthup ïa ki shipai ba la shongthait, ka don ka thong ban ïarap bad pynïoh ïa ki jingmyntoi kiba dei hok jong ki, khamtam ïa kito kiba mad jingeh hadien ba u shipai ula khlad, bad ban pynpoi ruh ïa ki jingmyntoi sha ki khun, ki khun kynthei kiba ïathoh shongkurim bad kiwei kiwei.
Ki nongïalam ka kynhun ki la ai jingshai ruh halor ki jingmyntoi ba ki Shipai ba la shongthait ki lah ban ïoh, kum ka baibam tymmen, ka bai skul, bad kiwei ki lad jingmyntoi kiba dei na ka bynta ka bha ka miat jong ki dkhot bad ki longïing jong ki.