La pynskhem ïa ki nongkitkam jong ka Mawmerang Primary Unit jong ka UDP

Mawkyrwat, ‘Nailar 06: Ka United Democratic Party (UDP) jong ka Ranikor Constituency katba nang ïaid ki sngi ka la nangïai pyntyllun ïa ki kam bad ban pynkhlaiñ kum ka jingpynkhreh na ka bynta ban ïa ai reng ha ka elekshon jong u snem 2023 ha kaba mynta ka kynti ka la ïoh ban pynskhem ïa ki nongkitkam jong ka UDP Mawmerang Primary Unit kaba la pynlong ha phyllaw jong ka skul ha shnong Mawmerang.
Ha kane ka sngi la ïoh ban pynsngew ïa ki nongkitkam jong ki samla bad kumjuh ruh ki nongkitkam jong ki longkmie ha kaba u nongmihkhmat jong ka Ranikor Constituency, u Bah Pius Marweiñ u la ïoh ban pynskhem. Haba ai ki kyntien jingkyrkhu kyrdoh na ka bynta ki nongkitkam kiba thymmai u la ong ba to kin trei ïa la ki jong ki kam kumno ban pynkhlaiñ ïa ki jingtreikam jong ka party ha ryngkat ki met kiba koit kiba khiah.
U bah Pius Marweiñ ha ka jingkren jong u la pynpaw ruh ba watla u dang ïaid ïa ka lynti kaba dang 4 snem duna hynrei haba phai pat ha ki kam pynroi u la ïoh ban leh shibun bah bad u la ai ruh ka jingkular ba un sa nang leh shuh shuh nangne shakhmat ym na ka bynta ka jingmyntoi jong u shimet hynrei ka jingmyntoi jong u paidbah ba bun balang.
U la ong ruh ba hapoh shnong Mawmerang ruh u la leh ïa kiba bun ki kam kum kaba pynshna ïa ka Madan jingïalehkai kynjatbol, ka jingtei na ka bynta ka skul, ka jingsam ki jingïarap ha ki longïing bad kaba sah mynta ban ai ïa ka kot ne order ba kin sa sdang noh shen ban shna ïa ka jaka saitjaiñ.
Haba phai ha ki kam pynroi hapoh jong ka konstitwensi pat, u bah Pius u la ong ba kin sa tip ynda ma u u la dep lut bad kular ba un sa ai da ka jingthoh kaba biang ne report khnang ba baroh kin tip bad ïohi ïa kiba bun bah ki kam ba u u la leh. Namarkata, u la khot ïa ki paidbah ban kin ai ka jingïatreilang ha ki liang baroh khnang ba yn dang lah ban pyntyllun ïa ki kam nangne shakhmat.
Ki nongkitkam jong ka United Democratic Party (UDP) jong ka Mawmerang Primary Unit ki long President u bah Pynshailin Iawphniaw, Vice President u Nipstarwell Iawphniaw bad u Banjoplang Wanniang, Secretary ka Usefulness Wanniang, Joint Secretary u Teldarose Syiemlieh bad ka Iamonbahun Wanniang, Finance Secretary u Afterborn Iawphniaw, Organizing Secretary u Dibarson Wanniang, Adviser u Shiningstar Wanniang bad u Kantondar Wanniang lem bad ki 12 ngut ki dkhot.
Katba ki nongkitkam jong ka Women’s Wing pat ki long President ka kong Spiordibora Sylemlieh, Vice President ka Anabolin Wanniang bad ka Usefull Jyrwa, Secretary ka Roslinda Wanniang, Joint Secretary ka Misdalin Wanniang bad ka Bigsiti Wanniang, Finance Secretary ka Pherlin Wanniang, Organising Secretary ka Stikly Iawphniaw, Adviser u bah Synshar Lyngdoh bad u bah Phlingshon Iawphniaw lem bad ki 7 ngut ki dkhot.
Hadien ka jingpyn-skhem ïa ki nongkitkam ba thymmai jong ki ar tylli ki shnad treikam u bah Pius Marweiñ u la aiti ruh ïa ka song pisa sha ka UDP Women’s Wing Mawme-rang Primary Unit ba kin ïoh ban pyndonkam ban thied ïa ki tiar jingdonkam ban pyntyllun ïa ka kam.