Nongpoh, Lber 30: Ki Nongïalam ka Khasi Students’ Union (KSU) Sengkmie ki la pynsmai bad pynskhem ïa ki nongkitkam kiba thymmai jong ka KSU Nongpoh Circle na ka bynta ka samoi treikam 2025-2028. Ha kane ka jingpynsmai, ki nongïalam ka KSU sengkmie kiba kynthup ïa u Eric A Nongkynrih, Sports Secretary bad u Bah Shining Kharbhikhiew, Environment Secretary ki la shim bynta ban pynskhem ïa ki 36 ngut ki nongkitkam ba la jied.
Ïa kane ka jingïalang pynsmai la pynïaid da u Samla Shining Kharbhikhiew ha ryngkat ka jingdonlang u Bah Ferdynald Kharkamni President KSU NKHD, Samla Toning Lapang Education Secretary KSU NKHD, bad kiwei kiwei de.
Ki nongkitkam thymmai kiba la shimti ïa ka kam hapoh ka Nongpoh Circle ki kynthup ïa u Samla John Lyngdoh kum u President, MacDonald Kharkamni kum u Vice President, Samla Baiashanlang Kharshanlor kum u General Secretary, Samla Rishotbaskhem Lapang kum u Asst. Secretary, bad kiwei kiwei.
Haba ai jingkren ha kane ka sngi, ki nongïalam ka KSU ki la ai khublei ïa ki dkhot ba thymmai bad pynkynmaw ba kum ki nongkitkam, ki dei ban long kiba shemphang bad don ïa ka jingkitkhlieh kaba skhem na ka bynta ka bha ka miat jong ka seng bad ka jaitbynriew.
Ki la kyntu ruh ba ki nongkitkam kim dei ban kynran dien haba mih kino kino ki jingeh, hynrei ki dei ban ïai ïeng ha ka nongrim jong ka KSU.
Nalorkata, la kyntu ruh ïa ki nongkitkam ba kin long kiba don akor bad burom, khamtam ha ka ïaid ka ïeng, bad ban don ka jingïatrei lang hapdeng ki para dkhot, khnang ba ka jingïasngewthuh bakla kan ym wan jia hapoh ka seng.
