La pynskem ïa ki nongkitkam bad ki dkhot jong ka UDP 5-Sutnga Saipung Block

Khliehriat Nailar 20: Ka United Democratic Party East Jaiñtia Hills District, hnnin ka sngi ka la pynlong ïa ka jingïalang ha shnong Sutnga, ha kaba la jied bad pynskhem ïa ki nongkitkam bad ki dkhot jong ka UDP jong ka 5-Sutnga Saipung Block, ha kane ka jingïalang la ïa don ryngkat lang ruh ki nongialam jong ka UDP na West Jaiñtia Hills District, haba kren ha ka jingialang u President ka UDP na West Jaiñtia Hills District, u ba dei u MDC ba rim u bah Moonlight Pariat, u la ong “Wat khmih lynti ïa ki hynñiew jaiñ spong na ri lum Jaiñtia lada khlem ka khlem ka jingtrei shitom” kane ka long ruh kum ka jingkyrsiew ïa ki heh ka UDP kiba don ha Shillong.
Shuh shuh, u bah Moonlight, u la ong ba ki heh ka UDP na Shillong ki ju ong ba ha ri lum Jaiñtia ngin ïohi biang ïa ki Hynñiew jaiñ spong, u la kren bynñiaw bad ong ba “Lada leh sa katno katno ruh ïa ki hynñiew jaiñspong te ym ïoh shuh, namar phim ju mih phim ju leit shano shano ruh, phi shu shong ha shillong namar kata lada khlem trei mano ban tip, donkam ban trei shitom ryngkat bad ka district ba da kawei ka mynsiem, kawei ka jingmut ban tei ïa ka party, haba kwah ïa ki hynñiew jaiñ spong hap ban trei shitom, donkam ban leit pynlong ïa ki jingïalang kiba heh kiba shong kun ha ki jaka bapher bapher khang ba ki paidbah kin ithuh ïa ka party ha ka rukom kaba dei, haba shu shong tang shi jaka kumne te kaba eh ban ong ban ïoh ïa ki hynñiew jaiñ spong”ong u bah Moonlight Pariat.Ha kajuh ka por, utei u nongïalam ka UDP na West Jaiñtia Hills, u la ai ruh ka jingkitbok kit rwiang ïa ki nongkitkam bad ki dkhot jong ka UDP 5- Sutnga Saipung Block ba kin nang lah ban trei shitom bad trei bha ban kyntiew ïa ka party ban wanrah ïa ka jingjop ha kane ka election ka ban wan.
U Deputy CEM ka Jaiñtia Hills Autonomous District Council, u bah Lasky Rymbai, u la ai mynsiem ïa ki nongkitkam bad ki dkhot jong ka UDP 5-Sutnga Saipung Block ba kin trei shitom ban pynjop ïa u kyrtong ka UDP ha kane ka election ka ban wan, u la ong ruh ba ka party UDP ka dei ka party riewlum kaba paka kaba peit ïa ki kup shiliang, ki sem shiliang bad ka dei ruh ka party kaba la ïakhun ban ïoh jylla kaba la tip mynshwa kum ka party APHLC bad hadien la tip kum ka HPU bad dei ha u snem 1997 la tip noh kum ka party UDP, ha kajuh ka por, u bah Lasky, u la kyntu ïa ki nongkitkam bad ki dkhot ba kin long kiba trei shitom ban kyntiew ïa ka party, la bynrap ruh ba kam pher lada ki ong ba ka party UDP ka kut tang ha Khanapara bad ha Malidor namar ka thong jong ka party hi ka long ban kyntiew ïa ka jylla, ïa ka ri bad ka jaitbynriew, ban pynneh pynsah ïa ka riti ka dustur jong ka ri bad ka jaitbynriew.U President rangbah jong ka UDP na East Jaiñtia Hills District, u bah Fineliness Bareh, uba dei ruh u MDC jong ka Khliehriat, u la ai ka jingkhublei kitbok kitrwiang ïa ki dkhot bad ki nongkitkam jong ka UDP 5-Sutnga Saipung Block, ha kajuh ka por, u la sneng la kyntu ïa ki ba kin don ka mynsiem ban tei bad ban pyn heh pyn san ïa ka party, ban ïa syllok ïa ki paidbah, ki kynthei ki khynnah, kumjuh ruh u la kyrpad ïa ki nongïalam bad ki dkhot ba lada ki kwah ban mih noh na ka party kim dei ban kynthoh ne kynnoh ïa ka party ne ïa ki nongïalam, hynrei dei ban pyni ba dei na ka daw shi met jong ki hi, u la sneng la kyntu ïa ki nongïalam bad ki dkhot ba kin don ka mynsiem jingia ieid, jingïatylli bad jingïa sngewthuh jingmut haba trei ïa ka kam khnang ban dup lah ban pyntyllun ïa ka kam jong ka party ban wanrah ïa ka jingjop ha kane ka election ka ban sa long ha u snem 2023.
Haba kren ha ka jingïalang, u President jong ka UDP 5-Sutnga Saipung Block, u bah Rocky Well Sutnga, u la kyrpad ïa kiba heh ba san jong ka party UDP East bad West Jaiñtia Hills District ba kin kyrshan, ban ai buit ai mynsiem lem khnang ban dup lah ban kyntiew, ban pynheh pynsan ïa ka party hapoh ka 5 Sutnga Saipung Constituency namar ba ka dei ka constituency kaba heh bad kaba ïar, u la ong ruh ba shen kin sa pynlong noh da ka jingialang jong ki dkhot ka Executive ban ïa pyrkhat noh ban wad ïa u kyrtong ban pynïeng ha kane ka election ka ban wan kaba da ka jing ïa hun bad jing ïa mynjur lang.Kiba la ai jingkren ki kynthup ruh u MDC ba rim, uba la jied kum u Working President, na Ratacherra, u bah Decius Pohshna, u President UDP Youth Wing, East Jaiñtia Hills District, u bah Coming one Tlang, u Secretary UDP West Jaiñtia Hills District, u bah Kitboklang Nongtdu, u MDC na Shangpung, u bah Treibor Suchiang.Ki nongkitkam jong ka UDP 5-Sutnga Saipung Block, kiba la jied bad pynskhem, ki kynthup, u President, u bah Rocky Well Sutnga, uba na ka shnong Sutnga, u Vice President, u bah Jamesely Well Dkhar, na Sutnga, ki Working President kiba kythup, u bah Decius Pohshna, na Ratacherra, u bah Shanbor Lamare, na Mookympad, u bah Nangpoi Pasleiñ, na Moriap, u Adviser, u bah Emlangki Lamare, u Secretary, u bah Da-o Lapasam, na Chiehruphi, Assistant Secretary, u bah Hem Chyrmang, na Jalaphet, kumjuh ruh la pynskem ïa ki 29 ngut ki dkhot Executive.La pynskem ïa kitei ki nongïalam bad ki dkhot jong ka UDP 5-Sutnga Saipung Block, da u President UDP East Jaiñtia Hills District, u bah Fineliness Bareh