SHILLONG, Risaw 23: Ka National Junior Athletics Championship kaba 39 kaba la thmu ban sdang naduh ka 25 tarik mynta u Risaw la pynsangeh bad pynkynriah noh namar ka jingwan ka eriong ‘Dana’ ka ban sa ïaid lyngba ka jylla Odisha, la ong ka synjuk ïalehkai jong ka ri ha ka sngi Hatmajai. Kane ka lympung kaba san sngi lynter la pynkhreh ban pynlong ha madan ïalehkai jong ka Kalinga Stadium.
Ha kaba ïadei bad kane, na ka liang jong ka tnat peit mariang jong ka ri, ka India Meteorological Department, ka la ong ba ka eriong Dana ka lah ban “kynriah shaphang shatei sepngi bad ïaid lyngba ka rud duriaw jong ka Odisha bad West Bengal hapdeng ka dewlynnong jong ka Puri bad Sagar hajan ka Bhitarkanika bad Dhamara (Odisha) ha ka por shiteng miet jong ka 24 tarik haduh ka step jong ka 25 tarik u Risaw, 2024.”
Kumta na ka liang jong ki bor pynïaid ka Athletics jong ka ri ki la rai ban pynsangeh noh shuwa ïa kane ka Championship bad ïa ka tarik ba thymmai ban pynlong yn sa pynbna kham hadien.
“Ïa ka 39th National Junior Athletics Championships la pynkynriah noh namar ka eriong (kaba dang wan) ha Odisha. Ia ka tarik kaba bud yn sa pynbna shen,” la ong ka kyrwoh jong ka Athletics Federation of India (AFI).
Lah ban kdew ba ka jylla hapoh ka lama jong ka Meghalaya Atheltics Association ka la sei ïa saw ngut ki khynnah ïalehkai ban leit ïakhun ha kane ka National Junior Athletics Championship kiba la mih na jylla ha ka sngi Hatmajai, hynrei ki la hap ban wanphai noh shala ïing namar ba la pynkynriah ïa ka tarik. Kine ki khynnah ïalehkai ki kynthup ïa u Rikangku D Sangma (U-14 ban aireng ha ka Kids Javelin bad ha ka Triathlon B), ka Rukini RT Dkhar (U-16 ka ban aireng ha ka 600M), ka Anisha Klein (U-20 ban aireng ha ka High Jump), bad u Donbok Shabong (ban aireng ha ka 400m).
