La pynpoi ïa ki Bhang ha Biar Aitnar, Tuberkmaishnong na ka bynta ka Behdeinkhlam Seiñ Raij Tuber

Khliehriat, Naitung 18: Ha ka jingleh niam Behdeiñkhlam kaba saw sngi lynter jong ka Seiñ Raij Tuber kaba la sdang naduh ka 16 tarik.mynta u bnai naitung  bad kaba yn pynkut lshai ka sngi ka 19 tarik u naitung, ki khun ki hajar kiba na ka phang neng bad na ka phang wah mynta ka sngi ki la pynpoi ïa ki Bhang ha ka Biar Aitnar na ka bynta ka lympung bah kaba yn pynlong lahsai ka sngi ha Tuberkmaishnong.

Ki shnong kiba na ka thaiñ phang wah, ki la leit shim ïa u bhang u Munoh na ka Seiñ Raij na Ïongkaluh, East Jaiñtia Hills bad ki khun ki hajar kiba na ka phangwah pat ki la leit shim ïa u Bhang na ka Seiñ Raij Mihmyntdu, West Jaiñtia Hills bad la pynpoi ha ka lympung Biar Aitnar ha Tuberkmai-shnong mynta ka sngi, ïa kine ki Bhang la pom bad la ot da ka hukum u Rynkaw Sumun kumba ki longshwa manshwa   ki la leh naduh ki por hyndai bad la pruid dak ha ki longdien ban pyndep ïa ka Niam Behdienkhlam ha ryngkat ka Adong Ki Blei Ki Syiem.

Ha kane ka jingleit shim ïa u Bhang, la pom uwei u dieng heh, dieng sah bad la thung, ban pynsah ïa ki dieng ki siej da ki phew phew tylli ha ka jaka ba ki la ïa pom ïa ne u Bhang, hadien kane ynda la poi ha ha Biar Aitnar ki paidbah kila shad, la mastieh sngewbha ha ryngkat ka put ka tem kaba da ka Bom, ka bhuri, ka Mew mew bad ka Bukur ryngkat ka kynhoi ka risa ban pynhun ïa U Rynkaw Sumun Bom bad hadien nangta baroh arliang kiba na ka Phangwah bad na ka Phang Neiñ kila leit ban ïuh kjat biang ha ka ïing, ka duwan u Lyngdoh Longsan bad ai ka nguh ka dem ïa u Rynkaw Sumun.

  Kane ka jinglehniam Behdeiñkhlam kan kut lahsai ka sngi ha ka lympung ba heh bah ha ka Biar Aitnar ha shnong Tuber-kmaishnong,  East Jaiñtia Hills District bad kane ka dei ka lympung kaba heh tam jong ka leh niam Behdeiñkhlam bad la ngeit ruh ba kane ka jingleh niam ka dei kata ka leh niam kaban beh noh sha jngai bah ïa ka khlam, ka pang ka shitom bad lyngba ka nguh ka dem la ngeit ruh ba ki khun ki hajar kin ioh ruh ïa ka koit ka khiah, ka bha ka miat, ka roi ka kiew ha baroh ki liang.

Ha ka sngi ba pynkut ia ka Behdeiñkhlam ha ka lympung ha  ka Biar Aitnar, yn wan ban sakhi lang ruh u myntri ka sorkar jylla, u bah paul Lyngdoh kum u kongsan lem bad ki riew rangbah kiba na jan bad na jngai ryngkat ki khun ki hajar jong ka. Seiñ Raij Tuber.