La pynngat ïa ngi ha ki kyndon ba shu thaw, tangba ngin mait shaphrang: KSU

Shillong, Naitung 12: Ki nongïakam ka KSU na Laitumkhrah bad kumjuh ruh jong ka CEC, ki la kynnoh ba ki Pulit ki la pynngat ïa ki dkhot ka KSU ha ki kyndon ki bym don satia hynrei kiba shu thaw hi tan ban pyntieng ba kin ym khynra shuh ïa ki nongbylla bar jylla.
Ïa kane ki la pynpaw ha ka por ba leit hajir u President bad u General Secretary ka KSU Laitumkhrah Unit hadien ba ki la leit hajirt ha Laitumkhrah Police Station mynta ka sngi.
“Ki kyndon kiba pynngat ïa ngi kim dei satia kiba long katkum ka aiñ, hynrei kidei kiba la shu thaw hi. Tangba na ka liang jong ngi, ngim tieng satia”, la ong ki nongialam ka Seng.
Ki la ïathuh ruh ba ha ka sngi ba ki leit khynra ïa ki nongbylla bar jylla la don lang ruh ki Pulit jong ka Infiltration bad ki Magistrate, da kaba kam ruh ba kim shym la ktah kti ïano ïano ruh. “Ngim dei kiba bieit ban shu leh kumta, hynrei kadei tang ka jingthaw suda ban pynbudnam ïa ngi”, la ong ki dkhot jong ka Seng.
Ha kajuh ka por ki nongïalam ki la ong ruh ba kin bteng beit kane ka jingkhynra katba ka sorkar kam pat pyntreikam ïa ka aiñ MRSSA bad ruh ban buddien ban pyntreikam ïa ka ILP.
Ha kajuh ka por ki Unit jong ka KSU kiba don ha kylleng kylleng ki jaka ki la pynlong ka jingleit khynra ïa ki nongbylla bar jylla ban talasi ïa ki kot ki sla jong ki. Ka jingkhynra ka la long ruh ha Upper Shillong, Mylliem bad kiwei kiwei de ki jaka. U General Secretary ka Seng, u Bah S. Kharbani, u la ong ba la lap 20 ngut ki nongbylla bar jylla ki bym don ki Work Permit na Upper Shillong. Na ka liang ki Kontraktor ruh ki la ïatreilang bad ka Seng ban phah noh ïa ki.
U Bah Kharbani u la ong ruh ba kaSeng ka pynlong ia kane ka jingkhynra kum ban bteng ia ka jingkhynra ka Sengh ia ki nongbylla bar jylla kumba la sdang da ka KSU Central Body ban buh ïa ka ILP Check Gate ha Ribhoi ha ka 6 tarik mynta u bnai. Ka daw ka long, u la ong ba ka ki nongbylla bar jylla kim dei ban shu wan bylla shane katba mon, namar u ong ba ka thma u Tirot Sing Syiem ha u snem 1829 ha Nongkhlaw ruh ka la sdang na ka daw ki nongbylla mynder ri.