Jowai, Nohprah 09: Ka District AIDS Control Officer (West bad East Jaiñtia Hills), District Integrated Strategy for HIV/AIDS (DISHA) Khliehriat Cluster, ha ryngkat ka jingkyrshan ka Project Director Meghalaya AIDS Control Society (MACS) Shillong, hynnin ka sngi kila pynlong ïa ka District Level World AIDS Day, ha District Library Auditorium, Jowai, halor ka phang, ” Overcoming Disruptions and Transforming the AIDS Responses”.
Naka liang ka Assistant Commissioner ka LBR Marak kum ka kongsan haka jingkren kala pynsngew ïaka jingpyrshang jong ka pyrthei baroh kawei ban ïakhun pyrshah ïa ka jingpang HIV bad AIDS. Kala ong kane ka phang jong une u snem ka long kum ka lad ban ïaleh pyrshah ïa kane ka jingpang da ki lad jingïada lyngba ki jingtest bad ki rukom ai jingsumar.
Kala ai ka jingïaroh ïaka District Aids Control Society, ka District Integrated Strategy for HIV/AIDS (DISHA) Khliehriat Cluster bad ka Meghalaya Aids Control Society, kila la mih ban pynsngewthuh ïa ka rukom ïalehpyrshah ïa kane ka jingpang HIV da ka jingkitkhlieh lang ha imlang sahlang.
Shuh shuh kala pynsngew halor ka jingaiti lut jong ki nongtrei ka koit ka khiah kiba hakhmat eh, ki Counsellor, ki seng treimon sngewbha bad ki volunteer kiba ai ka jingshakri khlem shongthait ban wanrah ïa ka jingkyrmen bad ka jingshngaiñ ka lawei.
U bah L.S Khonglah, Assistant Legal Aids Defense Counsel, WJH ula ban jur halor ka kyndon jong ka jingpang HIV/AIDS (Prevention and Control) Act, ula batai shwa u snem 2017 ki briew kiba im bad u HIV ki mad ïa ka jingshah lehbeiñ bad ka jingshah pynkyrpang haka imlang sahlang, haduh ba la pynlong ïa ka sorkar India ban pyntreikam ïa kane ka kyndon aiñ.
U Bah Khonglah ula pynshai ba kane ka aiñ ka thmu ym tang ban ïada bad tehlakam ïa ka jingpang HIV, hynrei ban ïada ruh ïa ka hok longbriew manbriew jong kito kiba shah ktah. Ha kaba ula pynpaw ïaka jingsngewkhia ba ka District mynta ka don haka kyrdan ba nyngkong ha ka jingpang HIV, ha kaba bun ki samla ki shah ktah, ula ban jur ïaka jingdonkam ban test man ka por ban sngewthuh ïaka jinglong ka koit ka khiah jong uwei pa uwei bad ban pynthikna ïa ka jingshngaiñ.
Ha kane ka sngi la pynlong ruh ïaka jingïakop Debate na ka bynta ki samla pule shi bynta ban rakhe ïa kane ka sngi World Aids Day, daka jingthmu ban pynïasoh ïaki jingmut jingpyrkhat bad ka jingsngewthuh jong ki shaphang ka jingpang HIV bad AIDS.
Kiwei de kiba ai jingkren ki long u ma Sunday Manner, Police Reserve, Jowai, Dr. P. Lamare, District TB Officer cum District Aids Control Officer East & West Jaiñtia, la ïoh ka jingkren pdiang sngewbha da u ma Sandy Tariang, Cluster Programme Manager, District Integrated Strategy for HIV/AIDS, (DISHA, Jaiñtia, ïa ka jingïalang la pynïaid da ka kong Rinibeh Patlong, Program Manager, MCSWA CC Khliehriat, katba Dr. Ferry Khonglah CSO, District Integrated Strategy for HIV/AIDS kala ai ki kyntien ai khublei.
