Khliehriat Lber 19: Ka ophis District Tuberculosis Centre, Jaiñtia Hills, mynta ka sngi ka la pynlong ïa ka prokram ba kyrpang kaba la tip kum ka World TB Day, 2025, kane ka long ban pynshai sha ki paidbah shaphang ka jingpang Tuberculosis (TB) bad ban iakhun pyrshah ban rat dyngkhong ïa kane ka jingpang, ïa ka prokram la pynlong ha Rymbai Government Secondary School, East Jaiñtia Hills District.
U Nodal Officer, National Tuberculosis Elimination Programme (NTEP), East Jaiñtia Hills District, u Dr L. Marbaniang, u la pynshai sha ki khynnah skul halor ka jingdonkam ban pynlong ïa kane ka prokram ai jingpynshai ha kaba ïadei bad ka jingpang TB bad u la batai ruh shaphang ka jingpang khieshohrih ne ka jingpang Malaria kaba kumno kine ki jingpang ki iabit na uwei u briew sha uwei pat bad ki dak ki shin jong kiba don ïa kine ki jingpang, u la batai ruh shibun kiei kiei kiba ki khynnah ki donkam ban leh ha ki ïing ki sem jong ki khnang ban ïada na ka jingpang TB bad ka jingpang Malaria.
U Medical and Health Officer, Rymbai PHC, Dr Lambapher Kharnaior, u la kren bad pynshai halor ka jingpang Tuberculosis bad ong ba kane ka jingpang ka dei kaba la don la slem bha bad batai ruh halor kumno kane ka jingpang ka iabit sha kiwei pat ki briew, u la ban jur bad kyntu ïa kito kiba don kane ka jingpang Tuberculosis ba ki dei ban long tista bha ha ka jingdih dawai haduh ban da khuid ka jingpang kumba batai da ki doctor kiba sumar bad lada kim pyndep ïa ka por ban dih ïa ki dawai ka jingpang kan sa kylla sha ka antibiotic-resistant bacteria ha ka met bad kane kan kham shimpor shuh shuh bad kham eh ka jingsumar bad ong ruh ba lada u/ka nongpang ki dih slem palat ïa ki dawai antibiotics kan ktah wat ïa u dohnud ne liver jong u nongpang na kata ka daw donkam ban dih tista ki dawai haduh hynriew bnai khnang ba ka jingpang kan khuid.
U Senior Tuberculosis Laboratory Supervisor (STLS), u bah Watson Siangshai haba kren ha ka prokram u la batai shai ïa ki khyndai tylli ki dak ki shin ne kita ki symptoms jong ka jingpang TB bad pynsngew ruh ïa ki lad ai jingiarap ki ban kyrshan da ka pisa na ka liang ka sorkar ïa kito kiba pang TB ha ka por ba ki dang don hapdeng ka jingshah sumar.
Hadien ka prokram, baroh ki heh sorkar kiba na ka tnat ka koit ka khiah, ki nonghikai, ki khynnahskul, hapoh ka jingialam u Senior Tuberculosis Laboratory Supervisor (STLS), u bah Watson Siangshai ki la shim ïa ka jingkular ne ka pledge ban rat dyngkhong ïa ka jingpang TB bad ka la don ruh ka jingiakren ne ka jingïaphylliewjingmut hapdeng ki khynnah skul bad ki doctor ha kaba ïadei bad ka jingpang TB bad ka jingpang Malaria.
Ha kane ka prokram la ïa don ryngkat lang ruh u Senior Malaria Inspector (SMI), East Jaiñtia Hills District,u bah Embhahmi Nongjngi bad kiwei kiwei.
