Khliehriat, Jymmang 03 :Shi ka jingrakhe ïa ka “Northeast Festival 2022” ka ba dei ka bynta jong ka “Azadi ka Amrit Mahotsav” na ka liang ka ophis Block Development Officer, Wapung C&RD Block hynnin ka sngi ka la pynlong ia ka “ Self Help Group(SHG) Mela cum Financial Literacy Camp,” hapoh ka madan jong ka shnongWapung Skur, East Jaiñtia Hills District.
Ha kane ka prokram la wan ïashim bynta lang da u A. Banarwal, IAS, Deputy Commissioner, EJHD, Khliehriat kum u Kongsan, Dr. T. Shylla, Block Development Officer, Wapung C&RD Block, Dr. R. Pyrtuh, Block Development Officer, Saipung C&RD Block, Bah T. Kyndiah, District Child Protection Officer, EJHD nalor kiwei pat ki riew pawkhmat.
Ha ba kren ha ka jingïalang, na ka liang u Kongsan u la ong ba ki Self Help Group(SHG) ki long ki ba donkam ym tang ha ka ba ïadei bad ka jingai mynsiem ki ba ïadei ha ki rukom treikam sha ki para briew lane ban ïarap ïa ki ba kin lait na ka jingduk jingkyrduh, hynrei ki long ruh ki rynsan ki ba ai bor hapoh ka imlang ka sahlang, ka ïoh ka kot, ka jingpynneh ïa ki kolshor bad kiwei kiwei pat ki bynta.
Nalor kata u la ong ruh ba ki SHG ki long kum ka rynsan ha ka ba kum ki nongshong shnong ki la pynïasoh lang na ka bynta ban kyntiew ïa ka rukom im bad khamtam ka la aibor ruh ïa ki kynthei ki ba long ka bynta jong ka kynhun ka ba khlaiñbor ha man la ki jingtreikam hapoh ka jylla.Na ka liang u DC u la ong ruh ba un pyrshang katba lah ban pynthikna ba ki SHG kin ïoh ïa ka jingphaikhmat jong ki paidbah namar ki mar ki ba ki pynmih ki dei napdeng ki ba bha tam hapoh ki ïew ki hat.
Na ka liang u Dr. T. Shylla, Block Development Officer, Wapung C&RD Block, ha ka jingkren u pyntip ba hapohWapung C&RD block ki don haduh 1710 tylli ki Self Help Groups (SHGs), bad ka jingdon jong baroh ki dkhot ka la kot sha ka 17000 ngut ha ki 102 tylli ki Village Organizations (VOs) ki ba don ha la ki jong ki jingtreikam bad ki tnat sorkar bapher bapher, kata kum ha ka ki kam ri jingri, kam rep kam riang bad kiwei pat ki jingtreikam.
Katba na ka liang u Bah Reading War, Advocate, Resource Person, District Legal Services Authority (DLSA), East Jaintia Hills District, Khliehriat u la pynpaw halor ki jingtreikam ba la ïarap da ka ophis jong ka District Legal Services Authority.Nalor ka jingkren ha ka ba ïadei abd ka jingrakhe ïa ka ‘International Workers’ Day,’ u la kren ruh ha ka ba ïadei bad ki kyndon aiñ bapher bapher ki ba aijingïada ïa ki nongbylla.
Ha kane ka prokram haduh phra tylli ki SHG ki la ïoh ïa ka mang pisa kum ka jingai ram ka ba kot sha ka T.12 lak na ki bank bapher bapher, ha ka ba artylli na kine ki dei lyngba ka Meghalaya Rural Bank, Wapung Branch ïa ka ba la aiti da u Deputy Commissioner, East Jaiñtia Hills District, Khliehriat, u A. Banarwal, IAS, sha ka Iatyllilang Self Help Groups jong ka Pamra-Paithlu bad ka Laibaitshaphrang Self Help Group jong ka Wapung Skur, ka ba long mar T. 2 Lak.
Ha kane ka mela la pyni ruh ïa ki ba bun jait ki mar ki mata, kata kum ki syntiew, ki mar bam, ki jhut ki jhep, ki soh, ki jingshna kti bad kiwei kiwei pat ia ki ba la wanrah bad pyni paidbah da ki SHG jong ka District.Ha kane ka Mela la wan ïashim bynta ruh da ki tnat sorkar bapher bapher jong ka District, kum na ka ophis Superintendent of Fisheries, EJHD, District Labour Officer, Block Development Officer, Wapung C&RD Block, District Legal Services Authority, District Agriculture Officer, District Horticulture Officer bad ka stall ba la pynkrheh da ka Meghalaya Rural Bank na ka bynta ka jingplie ia ki bank account.Kane ka long katkum u kyrwoh lyngba u District Public Relations Officer, EJHD Khliehriat.
