Shillong, Jymmang : Shi ka jingrakhe ïa ka “Northeast Festival 2022” ka ba dei ka bynta jong ka “Azadi ka Amrit Mahotsav”, na ka liang ka ophis jong ka Deputy Commissioner, East Khasi Hills District hynne ka sngi ka la pynlong ïa ka “SHG Mela cum Financial Literacy Camp,” hapoh Tirot Sing Memorial Secondary School, Mawkdok ka ba hap hapoh Khatarshnong – Laitkroh C&RD Block, East Khasi Hills, ha ka jingïadon lang u Bah Gavin M Mylliem, MLA kum u Kongsan bad I Kong I Laloo, DC East Khasi Hills kum ka Symbud Kongsan.
Ha ka jingkren plie ïa ka prokram, u Bah Gavin M Mylliem u la ong ba ka jingthmu jong kane ka prokram ka long ban plie ïa ka rynsan na ka bynta ki SHG ha ka ba kin lah ban pynpaw ïa ki kam na ki jingtrei ki jong ki bad ruh ban ïoh ïa ka lad ban ïamir jingmut lang bad ki para SHG ha ka ba ïadei bad ki rukom treikam bad ki jingnang jingtip.
Ha kajuh ka pro u la ong ruh ba Khatarshnong – Laitkroh Block ka dei ka thaiñ ka ba khring ruh ïa ki nongwan shangkai pyrthei na kylleng, bad na ka liang ki SHG ki dei ban shim ïa ka kabu halor kane ka jingwan ïuhkjat jong ki da ka ba pyndonkam ïa ki sap ki phong lyngba ki mar ki ba ki pynmih ka ban lah ban kyntiew ha ka ba ïadei bad ka ïoh ka kot bad ka roi ka par hapdeng ki nongshong shnong.
U Kongsan u la kyntu ruh ïa ki paidbah ba ki dei ban wan shakhmat bad ban pynrung kyrteng Aadhaar namar ka long ka ba myntoi na ka bynta ban ïoh ïa ki jait skhim bapher bapher na ka sorkar.Nalor kata u la pynshai ruh ha ka jingïalang na ka bynta ban shim bynta ha ki ‘financial literacy camp,’ khnang ba kan pynlah ïa ki ba kin ïoh ïa ki jingmyntoi lyngba ki tnat aijingïarap pisa.
Shi bynta jong kane ka prokram, na ka liang u Kongsan bad ka Symbud Kongsan ki la sam ruh ïa ki cheque ki ba kot T. 10 lak sha ki 10 tylli ki Village Organisations (VOs) ki ba hap hapoh ka Vulnerability Reduction Fund bad T. 22.5 lak sha ki 30 tylli ki SHG bad ka la don ruh ka jingpynkup burom ïa ki nongtrei Anganwadi ki ba la ïashim bynta ha ka jingïakhun pyrshah ïa ka jingpang Covid-19.
Kiwei pat ki ba la ïa don lang ha kane ka prokram ki kynthup ruh ïa u Bah D Hynniewta, Project Director DRDA, Bah L Kynjing, ADC I/c Sohra Civil Sub Division, Bah P S Tynsong, BDO Khatarshnong – Laitkroh C&RD Block, Bah R Kynta, COO, MSRLS nalor kiwei kiwei pat.
