Shillong, Jymmang 25: Ka prokram ai jinghikai (coaching course) Asian Football Confederation/All India Football Federation (AFC/AIFF) Goalkeeping A Diploma 2024-25 ka la kut noh hynne ka sngi Thohdieng ha Shillong.
La pynlong ïa ka da ka Meghalaya Football Association, kane ka prokram ai jinghikai la sdang naduh ka 21 tarik Jymmang ha kaba 14 ngut ki nongïashim bynta kiba la tbit ki la shim ïa kane ka prokram ai jinghikai.
Ki coach, kynthup ïa ki nongap kol ba pawnam jong ki snem ba la leit noh, ki kynthup ïa u Mohammed Yusuf Ansari, u Harry Benny C, u Sandip Nandy, u Chandan B Rathod, u Manu Patricio, u Jasmeet Singh, u Hameed KK, u Sugitesh Mandrekar, u Abhijit Mondal, u Lalit Thapa, u Jignesh Antala, u Vinay Singh, u Rafael Gracio bad u Subhasish Roy Chowdhury.
Ki nonghikai ki long u Gumpe Rime bad u Dinesh Nair. Ha kane ka sngi ba khatduh la donlang ruh u Vice-President ka MFA u Bah Cliff Nongrum bad u Bah Hering Shangpliang bad u Dkhot treikam jong ka MFA u Bah Freddy Kharpran, nalor kiwei pat.
Kane ka prokram ai jinghikai ka kynthup ïa ka bynta kaba kyrpang ha kaba ïadei bad ki nongap kol. Kane ka prokram ai jinghikai ka pynleit jingmut ha ka jingbishar bñiah bad u nongap kol bad ki nongïalehkai ha ka jingïalehkai, ka rukom ïalehkai, ka jingïatrei-lang bad u coach ba rangbah, ki coaching staff bad ka jingithuh ïa ki sap, la ong katkum ka website jong ka AIFF.
