Shillong, Lber 10: Ka prokram ba kyrpang hapoh ka phangpdeng “Viksit Bharat” ka India kaba la kiew shaphrang ka la long mynta ka sngi ha Nongpyndeng ha West Khasi Hills Distrik hapoh ka jingpynïaid jong ka Central Bureau of Communication Shillong, ha kaba la don palat 50 ngut ki nongïashim bynta, ba kynthup ki kmie ki kpa, ki khynnah, bad ki samla kiba la ïadonlang ban ïashim bynta ha ki jingïamir jingmut halor ka koit ka khiah, ka bha ka miat, bad ka jingkyntiew ïa ka shnong jong ki. Kane ka jingïalang, kaba thmu ban kyntiew ïa ka rukom treikam kaba pura na ka bynta ka roi ka par, ka dei kaba la saiñdur ban pynshlur ka jingïashim bynta ki briew ha ki shnong ki thaw bad ai mynsiem ïa ki samla ban nohsynniang sha ka jingkiew shaphrang jong ka ri.
Ka prokram ka la sdang da ka jingkren pdiang sngewbha na u Bah JosephasThongni, uba la batai ïa ki nongïashim bynta shaphang ka jingkongsan ka sienjam “Viksit Bharat” bad ka jingphai khmat kyrpang halor ka “Swachhata Hi Seva, NashaMukt Bharat Abhiyan, Mission Life, Atmanirbhar Bharat bad ka EkPed Maa Ke Naam. U la pynpaw ka jingsngewkmen jong u namar ka jingbun ki briew kiba wan sha kane ka jingïalang, khamtam ki samla, da kaba ong ba ka jingïashim bynta shitrhem jong ki samla ka long kaba kongsan ban tei ïa ka lawei kaba seisoh. U Bah Thongni u la ban jur ba ka prokram ka phaikhmat ym tang ha ka koit ka khiah jong ka met ka phad bad ka bor pyrkhat hynrei kumjuh ruh ha ka roi ka par ba ïaineh jong ka shnong ka thaw, kiba long ki rishot ba kongsan jong ka ri kaba seisoh ki kam.
Ïa ka bynta ba kongsan jong kane ka prokram ka dei kaba la ai jingkren da u Bah Mangkara uba long u nurse ba baroh ki burom, uba la kren halor ka phang ba kongsan ba ïadei bad ka koit ka khiah jong ki khynnah samla. Ka jingkren jong u ka ban jur halor ka koit ka khiah jong ka met ka phad bad ka bor pyrkhat, ha kaba u la ai shibun ki jinghikai ïa ki samla ba ïadon lang ha kane ka jingïalang. U la ban jur ïa ka jingkongsan ban pynneh ïa ka rukom im kaba ryntih, ba kynthup ka jingkilan met ba man ka por, ka jingïoh ïa ka bam kaba tei ïa ka met bad ka por thiah kaba biang. U Bah Mangkara u la kren ruh shaphang ka jingkongsan ban don ka um ha ka met da kaba dih ka um kaba khuid bad kilan met man ka por na ka bynta ka koit ka khiah. U Bah Mangkara u la ai ka por ban ïamir jingmut halor ka koit ka khiah jong ka bor pyrkhat, bad kyntu ïa ki samla ban long kiba husiar na ka jingban khia, jingkhuslai, bad jingsngew marwei, kiba long ki jingeh ba ki khynnah samla ki mad bha mynta. U la pynshlur ïa ki ban ïakren bad kiba haïing, lane ki paralok ba ki sngewjan na ka bynta ka jingïarap lada ki sngew ba shah ban khia. U la ban jur ïa ki jingma jong ki jingdih pynbuaid bad ki jingma jong ka jingpyndonkam palat ïa ka phone, u la ai jingmut ïa ki samla ban kiar ban shaniah ha ka teknoloji hynrei pynleit jingmut ban tei ïa ki jingmlien ba koit ba khiah.
Ban kyntiew shuh shuh ka jingïashim bynta ki briew, la pynlong ïa ka jingïakob quiz halor ki phang ba ïadei bad ka koit ka khiah hadien ki jingkren. Ka quiz ka kynthup ïa ki jingkylli ba ïadei bad ki samla, ki kmie ki kpa bad ki khynnah, kynthup ïa ki kam bapher bapher kum ka bam kaba tei, ka koit ka khiah jong ka bor pyrkhat, bad ka jingkongsan ban pynneh ïa ka rukom im kaba koit ba khiah. Ka jingïakob ym tangba ka long kaba ai jingtip hynrei ka long ruh kaba sngewtynnad, bad lai ngut ki nongjop ki la ïoh pdiang ïa ki khusnam pisa – ba nyngkong: Unita Rongrin, ba ar: ManeshMawblei bad ba lai: Shimtihun Dkhar.
Hadien ka quiz, ka prokram ka la kylla sha ka sienjam ba ïadei bad ka mariang – ka jingthung ïa ki diengsoh sawdong ka khlaw shnong. Ïa kane ka bynta la ïalam da u Gopajit Das, Assistant Director jong ka CBC bad PIB Shillong, ha ka jingïadonlang ruh ki riew rangbah jong ka shnong bad ki nongïalam jong ki samla. Ka jingthung ïa ki diengsoh kadei shi bynta jong ka sienjam ba ïar jong ka “Viksit Bharat” ban kyntiew ïa ka jingïaineh ka mariang bad kyntiew ïa ka jingdon jingkitkhlieh na ka bynta ka mariang. Ka jingthung dieng ym tangba ka nohsynniang sha ka jingdon jingem ha ka thaiñ hynrei ka pynbiang ka tyllong jingbam ba ïaineh na ka bynta ki briew jong ka shnong. Ka sienjam ka thmu ban kyntiew ka jingjyrngam ha kylleng ka shnong Nongpyndeng, kyntiew ïa ka jinglong ka lyer, bad pynthikna ki jingmyntoi ïa ka shnong na ki jingaiei ka mariang ïa ki pateng ban wan.
Ka prokram ha kane ka sngi ka la kut da ka jingkren ai khublei na u Gopajit Das. U la pynpaw ka jingsngewnguh jong u ïa baroh ki nongïashim bynta, khamtam ki samla kiba long ka bynta ba kongsan ban pynlong ïa kane ka prokram kaba jop. Ha ka jingai jingkren jong u, u Gopajit Das u la ban jur ïa ka jingkongsan ki sienjam ba ïalam lynti da ka imlang sahlang kum ka prokram kaba mynta ka sngi ban tei ïa ka India kaba la kiew shaphrang bad kaba ïaineh.
U la pynshlur ïa baroh ban bteng ban pdiang ïa ki jingngeit ha ka jingsumar ïalade, ka jingburom mar kylliang, bad ka jingsngewthuh ïa ka mariang.
Ka la don ka jingïashondur lang ban buh jingkynmaw ïa kane ka jingïalang, kaba la pynskhem shuh shuh ïa ka jingsngew ïatylli bad ka jingïatrei lang.
Ka prokram ba kyrpang halor ka “Viksit Bharat” ha Nongpyndeng ka pyni ïa ki thong ba ïar jong ka sienjam jong ka ri ban kynthup ïa ki briew jong ka thaiñ ha ka jingtei ïa ka lawei kaba ai bynta lang ïa baroh bad kaba ïaineh. Ka jingïalang ka la wanrah lang ïa ki briew bapher bapher, kiba ïatylli ha kawei ka jingthmu na ka bynta ka India kaba la kiewshaphrang bad kaba don ki briew kiba koit ba khiah.
