Khliehriat, Rymphang 15: Ïa ka prokram kaba ïadei halor ka Football For School kaba dei ka prokram kaba hapoh ka Ministry of Education, jong ka sorkar India kaba don ka jingïatreilang bad ka FIFA la pynlong myn ha ka 13 tarik mynta u bnai rymphhang ha Jawahar Navodaya Vidyalaya, Rymbai, East Jaiñtia Hills District bad ka jingthmu jong kane ka prokram ka long ban kyntiew ïa ka jingbit jingbiang ka met ka phad, ka jingdon ka mynsiem iatreilang ne Teamwork, ka jingkhuid jingsuba ba kin ïaid lang ryngkat bad ka pule ka puthi.
Ka jingthmu jong kane ka prokram Footbal For School ka long ruh ban pynsngewthuh ïa ka jingdonkam ka jingïalehkai sports ha ryngkat ka pule puthi bad ka pynphalang ruh ïa ka jingangnud ka sorkar ban kyntiew ïa ki samla ba kin don ka jingiatreilang shaduh ka kyrdan National bad International Level.
Haba kren ha ka jingïalang, u District School Education Officer (DSEO), East Jaiñtia Hills District, u bah R. Diengdoh u la batai ïa ka jingïatreilang kaba hapdeng ka Ministry of Education bad ka FIFA kaba dei ka synjam ka ban pynkhlaiñ ïa ka kam ïalehkai sports ha ki skul, u la ong ba ka rynsan jingialehkai football kam dei tang ka jingialehkai sports hynrei ka dei ruh kaba lah ban kyntiew ïa ka jinglong jingman jong u ne ka briew kaba naduh ki skul, u ai ka jingiaroh ïa ka jingïa shimbynta shit rhem ki khynnah skul kiba pynpaw shyna ba kane ka synjam ne kane ka prokram ka dei ka ba ai mynsiem ïa kiba bun ba kin ïa shimbynta ha ka jingialehkai sports, u ai ruh ka jingiaroh ïa ki bor pynïaid skul jong ka Jawahar Navodaya Vidyalaya, Rymbai khamtam u Principal, ki nonghikai bad ki nongtrei kiba la shim khia bha ban kyntiew ym tang ïa ka jingnang jingstad hynrei ban kyntiew ruh ïa ka kam ialehkai sports hapoh ka district.
Kum ka jingai mynsiem ïa ki khynnah skul, u bah Diengdoh u kyntu ïa ki khynnah skul ba kin shim ïa kane ka kabu ba ki ioh lyngba kane ka prokram ban trei shitom ban poi sha ka thong bad ong ruh ba da ka jingtreishitom bad jingshim khia ban pyntbit ïalade kin sa lah ban long ki nongialehkai football kiba tbit.
Kum ka dak ka jingplie ïa kane ka prokram, kaba long ruh kum ka dak ka jingjop ha kaba pynurlong ïa ka prokram, u kongsan u la kynjat nyngkong ïa ka bol bad ki don haduh 112 FIFA Football ba la sam sha ki 29 tylli ki skum ha East Jaiñtia Hills District, ha kane ka prokram Football Distribution Ceremony la ïa don lang ruh u Principal jong ka skul JNV Rymbai, u Dr. R. Kumar, ki nonghikai, ki nongtrei bad kiwei kiwei.
