Mawkyrwat, Rymphang 10: Ka Revenue & Disaster Management Department, Meghalaya State Disaster Management Authority (MSDMA), ka Ranikor Sub-Division ryngkat ka District Disaster Management Authority, South West Khasi Hills District lyngba ka jingïatreilang bad ka National Disaster Management Authority (NDMA), Ministry jong ka Home Affairs ka Sorkar India ha ka 9 tarik u Rymphang, 2026 ka la pynlong ïa ka Multi State Level Mock Exercise halor u jumai (earthquake) ha Ranikor Civil Sub-Division, South West Khasi Hills District.
Ha shwa ban sdang ïa ka Mock Exercise la pynpah nyngkong eh ïa ka siren ha ka por 12:30 shiteng sngi bad jingkhyñium u jumai ba don ïa ka jingthew ba 8.2, bad hadien kata, mar mar la pyntreikam ïa ka kynhun ïaleh pyrshah ïa ki jingjia ne ka Incident Response Team (IRT) da ka Incident Command (IC), ba la ïalam da u Bah L.T. Tariang, MCS Additional Deputy Commissioner, In-charge Ranikor Civil Sub Division ka South West Khasi Hills District, bad u bah S. Marweiñ, MCS, Assistant Commissioner & Block Development Office ka Ranikor C&RD Block kum u Deputy Incident Command (DIC) ryngkat bad ki Observer.
Ka jingpynkhreh baroh ki la bud ryntih ïa ki jingbthah jong u IC, ha kaba la pyntreikam ruh ïa ka Operations Section (OS), ka Logistics Section (LS), ka Planning Section (PS), ka Staging Area (SA), ka Medical Aid Post (MAP), bad ka Relief Camp Manager (RCM) bad kiwei ki jingdonkam.
Ïa kane ka State Level Mock Exercise la pynlong kyrpang ha Ranikor Civil Sub Division kaba hap hapoh ka Ranikor C&RD Block, South West Khasi Hills District, ha kaba ha kane ka Mock Exercise ki don 12 ngut ki briew kiba la mynsaw, bad 2 ngut kiba ïap bad kumjuh ruh la buh ruh ïa ki katto katne ki jaka ban don jingjia kum ha Petrol Pump ba don ka jingpluh ding, ka jinghap bad thwa khyndew hajan ka jingkieng Borbasing, ka jinghap jong ka ïing ha ophis jong u SDO Ranikor Civil Sub Division bad jinghap ka Canteen ne ka dukan sha.
Lah ban kdew ba ha kane ka drill ka kynthup ïa ka jingpynkynriah, ka jingwad bad pyllait im, ka jingai jingsumar nyngkong, bad ka jingkit ïa ki briew kiba mynsaw lyngba ki Ambulance sha Medical Camp bad Ranikor CHC.
Ha kaba kut jong ka Mock Exercise, la ïoh jingkren na u Incident Command (IC), u Additional Deputy Commissioner, In-charge jong ka Ranikor Civil Sub Division ka South West Khasi Hills District, u bah L.T. Tariang, MCS ha kaba u la ai khublei ïa baroh kiba la don bynta ha kane ka pyndep ïa la ki jong ki jong ki kam ram ha kane ka sngi bad da ka jingïashimbynta lang jong ki kane ka prokram ka la long kaba jop. Kumjuh ruh ju la ong ba lyngba kane ka Mock Exercise kan long kawei na ki lad jingïarap na ka bynta jong ki kumno ban pynkhreh da lada wan jia shisha ka jingkhih u jumai.
