Jowai, Jylliew 21: Ka District Hub for Empowerment of Women lyngba ka District Social Welfare Department, West Jaiñtia Hills District ha ryngkat ka jingïatreilang bad ka ophis u Deputy Commissioner, Yoga Cell, NSS Cell, bad ka NCC Cell ka Kiang Nangbah Government College, mynta ka sngi 21 tarik u Jylliew ki la pynlong ïa ka ‘International Day of Yoga’ halor ka phang kaba ong “Yoga for One Earth One Health” ha Kiang Nangbah Yoga Center (Indoor Hall) Jowai.
Ïa kane ka jingïalang bad ki rukom ki lan la pynïaid da u ma Hercules Toi, uba dei u Member Secretary Yoga Cell bad la wan ban ïashim bynta lang da u bah GLC Mylliem, Assistant Commissioner, Jowai uba la kren halor ka jingdonkam ban leh ïa ka Yoga manla ka sngi haka jingim, ula pynnsgew ruh ba ka jingki lan Yoga ka long kaba donkam eh ym tang ha kum kane ka sngi kyrpang.
U ma H. Toi haka jingkren ula ong ka Yoga kam dei tang ka jingki lan met hynrei ka don ka bynta ba kongsan eh ban pynïadei ïa ka bor met, ka jingmut jingpyrkhat bad kumjuh ïa ki sawdong sawkun jong ka mariang.
Shuh shuh ula bynrap ba ka jingki lan Yoga kan ïarap ïa ka jingmut jingpyrkhat jong u briew bad ban pynïoh ïa ka jingim kaba suk ba kmen ha manla ka sngi.
