Jowai, K’Lyngkot 16: Ka ophis jong ka District Horticulture, West Jaiñtia Hills hapoh ka Mission for integrated Development of Horticulture (MIDH) 2024-2025, ka la pynlong ïa ka Horti Fair -cum -Exibition ha madan Marian Hill Higher Secondary School, Moosalyngkat, Jowai mynta ka 16/01/2026.
Ha kane ka ïew pyninam ki nongrep bad ki nongseng kam seng jam na kylleng ka District kila wan ban pyni ïa ki mar rep jong ki bad kiwei de ki mar ba ki pynmih.
Ha kane ka prokram la wan ban ïa shim bynta da ka kong D.V Lyngdoh, MCS Additional Deputy Commissioner, West Jaiñtia Hills, Jowai kum ka kongsan bad ka kong Luciana Lakiang, MAS Joint Director ka tnad Horticulture (P.A&A), Shillong kum ka symbud kongsan.
Haba ai jingkren sha ki paidbah, ka kong DV Lyngdoh, ka la ïaroh ïa ka jingtrei shitom jong ka tnad Horticulture ha kaba pynlong ïa ka Horti fair- Cum -Exhibition na ka bynta ka jingmyntoi jong ki nongrep, kaba wanrah ïa ki nongrep na baroh saw tylli ki Block jong ka District ha kawei ka rynsan ban pyni ïa ki mar bad ki buit thymmai jong ki.
Ka la ban jur ba kane ka jingpyninam ka la long kum ka rynsan kaba kongsan na ka bynta ban ïasam jingtip hapdeng ki nongrep bad ka la pynshlur ïa ki nongrep ban ïasam ïa ki jingmut, ki jingshem bad ki rukom treikam. Ki nongrep ki ioh ruh ia ka lad ban iakynduh bad ki heh na ki tnad bapher bapher bad ban ioh jingtip shaphang ki skhim sorkar bapher bapher bad ki prokram kyrshan.
Ka kong Lyngdoh ka la pynpaw shuh shuh ba kum kane ka jingpyni nam ka don ka bynta kaba kongsan ha kaba kyntiew ia ka sap ka phong, ka jingnang jingstad bad ka jingshaniah jong ki nongrep, kaba iarap ban kyntiew ia ka rep ka riang.
Haba ai mynsiem ïa ki nongrep, ka la kyntu ïa ki ban pyndonkam hok ïa kum kine ki lad, ban ïai aiti lut ha la ka kam, ban shim ïa ki rukom bad ki buit thymmai bad ban pynpher ïa ki kam jong ki ban kyntiew ïa ka jingmih bad ka ïoh ka kot bad ban ym sangeh satia ha ka jingïaleh jong ki kaba bteng ban jop.
Ha ka jingkren lamphrang jong u Bah R. Lamare, Assistant Director ka Horticulture, West Jaiñtia Hills, Jowai u la pynshai ba ka MIDH ka dei ka skhim ba la bei tyngka da ka sorkar pdeng kaba thmu ban kyntiew ïa ka kam rep ba pura. U la pynpaw ba ka mission ka phai khmat sha ka jingpynkiew ka jingmih, ban pynbha ïa ki tiar thung jingthung, ban pynshlur ïa ka jingthung hadien ba la dep ot, ban kyrshan ia ka jingpynkiew dor bad ban ai jingiarap pisa ïa ki nongrep ban kyntiew ïa ka ioh ka kot bad ka jingim jong ki.
Ka ka kong Luciana Lakiang, MAS Joint Director of Horticulture (P.A&A), Shillong ka la ai mynsiem bad pyntip sha ki nongrep halor ki skhim bapher bapher kiba don hapoh ka tnad Horticulture bad Agriculture. Ka la ban jur ïa ka jingdonkam jong ki rukom rep tynrai bad kiba kynja met khnang ban pynthikna ïa ka koit ka khiah kaba bha bad ka rukom rep kaba neh. Ka la pynpaw ruh ïa ka jingdonkam ban rep ïa ki jingthung kiba don dor bha, da kaba batai ba ka jingrep ïa kum kine ki jingthung ka lah ban kyntiew ïa ka ïoh ka kot jong ki nongrep bad ki nongseng kam seng jam.
Ka kong M War, Assistant Director Agriculture Officer, (Agronomy) ka la ai jingmut ïa ki nongrep halor ka jingïoh jingmyntoi na ki skhim sorkar. Ka la ai jingmut ïa ki nongrep ba lada jia ba ki jingthung jingtep ki duh na ka daw jong ka bor mariang ki dei ban aiti ïa ka kaiphod sha ophis hapoh 48 kynta ban pynthikna ïa ka jingïarap ha ka por kaba biang. Ka la pyntip ruh ba ki jingkyrshan ki don lyngba ki prokram bapher bapher jong ki ram kiba duna ka sut kum ka KCC, ki skhim insurance ban ïada ïa ki jingthung jingtep bad kiwei kiwei ki jingthmu kiba ai ïa ki tiar bad ki mashin bad ki jingdonkam ha ka rep ka riang. Ka la pynshlur ruh ïa ki nongrep ba kin leit sha katei ka ophis ha kano kano ka por ba donkam da kaba pynthikna ba ka ophis ka don ka jingangnud ban kyrshan ïa ki nongrep.
Ka kong S.E Kynjing, District Horticulture Ophisar ka West Jaiñtia Hills Jowai, u bah Demandson Lyngdoh, Assistant Director ka tnad Horticulture (Marketing), West Jaiñtia Hills, Jowai, ka kong Smt. Lakidon Khonglah, HDO Amlarem, kong Aibapynsuk Khongwar u ADO (HQ), u DAO Jowai bad ka A.M. Pasweth, Horticulture Development Officer (PP) ka West Jaiñtia Hills, Jowai kila ïadonlang ha kane ka sngi.
Hadien kane, ka kongsan ha ryngkat kiwei pat ki riew pawkhmat ki la leit jngoh ïa ki stall pyni nam. La sam ruh ia ki khusnam sha ki nongjop ha kane ka jingpyninam.
