Shillong, Ïaïong :Ka GAVI Alliance (ba la tip kham hashwa ka Global Alliance for Vaccines and Immunisation) ka dei ka kynhun ïatreilang jong ki ri ka pyrthei halor ka koit ka khiah jong ki public bad private sector organization ki ba pynleit jingmut ha ka ba ïadei bad ka jingai tika injek sha baroh.
Ka jingthmu ba kongsan jong ka GAVI ka long ban pynïaid shaphrang ïa ki prokram ai tika injek.Ka Gavi ka dei ruh ka kynhun noh synñiang ba kongsan ha ka ba ïadei bad ki jingai tika injek khamtam ha kito ki ri ki ba ki ba duna bad kham pdeng ha ka liang ka ïoh ka kot.
Shi bynta jong kane ka sienjam la pynlong ïa ka “GAVI-INDIA Strategic Partnership 2022- 26 Workshop” hynne ka sngi hapoh Shillong Club, Shillong na ka bynta ki sawtylli ki jylla ka thaiñ shatei lammihngi (North East), ki ba kynthup ïa ka Meghalaya, Mizoram, Arunachal Pradesh bad Nagaland.
ïa kane ka prokram la wan plie da u Ramkumar S. IAS,Mission Director, NHM Meghalaya. ïa kane ka workshop la khot pynlong da ka National Health Mission, Meghalaya ha ryngkat ka UNDP Meghalaya.Kiwei pat ki kynhun paralok (Development patners) ki ba ïarap ha ka ban kyntiew halor kane ka bynta ki kynthup ïa ka UNICEF, WHO, JSI bad ka JHPIEGO.
Ki nong ïashim bynta ki kynthup ïa ki nongmihkhmat da kitei ki Development patners bad napoh ka State bad District Immunization Officer ka Meghalaya, Mizoram, Nagaland bad Arunachal Pradesh.
La pynlong ïa kane ka workshop ban ïamir jingmut halor ki lad ki lynti ki ba ka Alliance ka la shim ban pynïabiang ïa ka jingthylli ha ka ba ïadei bad ki prokram ai tika injek ki ba dang don ha ki ba bun ki bynta jong ka ri.
Kane ka workshop kan ïarap ruh ïa ki kynhun ki ba ïa don bynta ba kin jurip bad pule bniah halor ki jingeh bad ki daw balei ba ki dang ïai don ki jingeh ha ka ba ïadei bad ka jingpyrshang ban pynïoh ïa ka jingai tika injek ka ba pura.
Shuh shuh ka jing thmu ha ka ba pynlong ïa kane ka workshop ka long ruh ban shim ïa ki lad ki lynti ki ban lah ban pynïoh ïa ka jingai tika injek sha baroh ki khynnah khamtam kito ki bym pat ju ïoh mynno mynno ruh da ka ba pyndonkam ïa ki sienjam ki ba katkum ka jinglong jong kito ki thaiñ bad ruh ban sngewthuh halor ka nongrim jong ki paidbah nongshong shnong.
Ka GAVI kan ai ka jingkyrshan ïa ki jylla ha ka ban pynurlong ïa kane ka thong ha ka jingïateh ka ba san snem naduh ka 2022-2026.