La pynlong ïa ka District Level Science Seminar ha JEC Khliehriat-EJHD

0

Khliehriat Nailar, 28 : Ka ophis jong ka District School Education Officer (DSEO), East Jaiñtia Hills District mynta ka sngi ka la pynlong ïa ka District Level Science Seminar ha Jaiñtia Eastern College, Khliehriat East Jaiñtia Hills District bad ka phang jong kane ka prokram ka long ‘“The Quantum Age Begins: Potentials and Challenges” bad ha kane ka rynsan ki khynnah ki ïoh ban pynpaw ïa ki jingtip jong kine ki sap ki phong ba ki lah ban leh da ki kor ki bor ne ki techonology.
Ha kane ka prokram ki khynnah ki la lah ruh ban pynpaw pyrthei lyngba ka power-point presentations ha kaba ki la batai ïa katei ka phang ‘Potentials and Challenges of the Quantum Age’ bad ha man la ki jingbatai ne ki presentation ki la don lang ruh ki nonghikai kiba ïakren bad ki halor ka phang ba ki kren ne batai.
Ha kane ka prokram la don ruh ka jing ai khusnam kaba da ka song pisa bad ki syrnot sha baroh kiba la ïa shim bynta bad kumjuh ruh sha kito kiba jaop ha ka jingïakop ha ka presentation ne jingbatai bad kane ka long ruh kum ka seminar.
U Peter Arsalon Pyngrope uba na Khliehriat Higher Secondary School, u la ïoh ha ka kyrdan ba nyngkong, u Beneiah Gadiel Sutnga uba na Little Star Secondary School, Ladrymbai u la ïoh ba ar bad ka Bornah Rabha kaba na Rymbai Government Secondary School ka la ïoh ba lai ha ka jingïakop ai jingbatai ne presentation.
Ïa ka khusnam bad ki syrnot la ai ruh sha ki skul kiba la ïa wan ban ïa shim bynta ba kynthup ka skul Sacred Heart Secondary School, Byndihati, Little Flower Secondary School, Khliehriat, Sutnga RMSA Secondary School, Khliehriat Presbyterian Higher Secondary School, Khliehriat bad Little Star Academy Secondary School, Khliehriat.

Leave A Reply

Your email address will not be published.