La pynlong ïa ka District Level Science, Mathematics bad Environment Exhibition 2022 ha Mawkyrwat

Mawkyrwat, Jymmang 30: Ka ophis jong ka District School Education Officer, South West Khasi Hills District, Mawkyrwat mynta ka sngi ka la pynlong ïa ka District Level Science, Mathematics bad Environment Exhibition 2022 ha Nativity Higher Secondary School, Mawkyrwat ha kaba ka kong C. Kharkongngor, IAS, Deputy Commissioner ka South West Khasi Hills District ka la long ka kongsan.
Haba kren kum ka kongsan ha kane ka jingïalang, ka kong Kharkongngor ka la ong ba ka Science bad ka jingpyndonkam ïa ka ka long kaba donkam bha ha kine ki sngi kiba mynta ha kaba ka la wanrah shibun ki jingkylla ki ban kham pynsuk ïa ka jingim jong ngi ki briew. Ka la ban jur ba da ka jingkiew sted jong ka saïan bad teknologi ki don mynta ïa ki mobile phones ha kti ha kaba ki ki lah ban ïoh ïa shibun ki jingtip ka ban pynkhlaiñ bad pynshlur ïa ki jingmut jingpyrkhat jong ki.
Ka la ban jur halor ka jingdonkam jong ka saïan bad teknologi ha kane ka juk kaba mynta da kaba pynshlur ïa ki khynnah ban shim ïa kine ki subjek kiba lah ban kyntiew ha ka jingim bad nangpynïar shuh shuh ïa ki jingmut jingpyrkhat bad pynshlur ïa ki ban jam shakhmat bad ban don ka jingangnud ban kiew artet. Haba ka la pynpaw ba kiba bun na ki ‘riew lum ki ïaleh ban kiar na kaba shim ïa kine ki subjek, kumta ka la ai mynsiem ïa ki khynnah ba ki dei ban long kiba shlur bad ban shim ïa ka saïan kum ka subjek ka ban kyntiew ïa ki ha baroh ki liang.
Shuh shuh ka la ong ba ka kamram jong ki khynnah ka dei ban pule, ban wad bniah, ban shna bad thaw buit bad lada ki don ka thong ha khmat ryngkat ka jingkut jingmut ymdon jingeh kaba lah ban khang ïa ki na kaba kiew shaphrang. Ka la ong ba ki ki im ha ka juk ba ki shem ïa shibun kiei kiei kiba thymmai da kaba pynshlur ïa ki khynnah ban peit thuh bad wad bniah khnang ba kin long ka jingmyntoi ïa ka imlang sahlang ha ki por ban wan.
Ban pynkut, ka la kitbok kit rwiang ba kane ka Exhibition kan ïaid beit shakhmat da kaba khmih lynti ba kin mih bun ki nongïashimbynta ha ki snem ki ban wan.
Lah ban kdew ba ha ha kane ka District Level Science, Mathematics bad Environment Exhibition 2022 kumba 8 tylli ki skul ki la ïashimbynta ha kaba ka Maharam Government Higher Secondary School, Mawkyrwat ka la long ka nongjop bud da ka Horirai Higher Secondary School Mawkyrwat ha ka kyrdan kaba ar bad ka Nativity Higher Secondary School, Mawkyrwat ha ka kyrdan kaba lai.
Ka kong S. Kharsahnoh, District School Education Officer, Mawkyrwat ka la pynïaid ïa ka jingïalang katba u bah D.G. Nongsiej, Sub Divisional School Education Officer, Mawkyrwat u la ai ïa ki kyntien pdiang sngewbha katba u bah S.S. Lyngkhoi, Additional SDSEO u la ai ïa ki kyntien khublei.