La pynlong ïa jingïalang DPDC ban bishar bniah ïa ka jingpyntrei ïa ki skim Sorkar ha EJH

Khliehriat, Nailar 20 : Ka ophis jong u Deputy Commissioner ka East Jaiñtia Hills District mynta ka sngi ka la pynlong ïa ka jingïalang, ka District Planning and Development Council (DPDC) bad ïa kane ka jingïalang la pynlong ha NIC Conference Hall, ha ophis jong u Deputy Commissioner, East Jaiñtia Hills District, ha Khliehriat bad ka Chairperson, Assembly Committee on Women Empowerment kaba dei ruh ka MLA jong ka Sutnga- Saipung, ka kong Santa Mary Shylla ka la ïa don lang ha kane ka jingïalang.
Kane ka jingïalang ka long ban peit bad bishar bniah ïa ki kam lane ki skim sorkar kiba pyntrei hapoh East Jaiñtia Hills District, la ïa don lang ruh ki heh sorkar kiba na ki tnat bapher bapher ha kaba ki la pynpaw bad pynshai ïa ki jingtrei bad jinglut jingsep ha ka jingpyntyllun ïa ki kam ne pyntrei ïa ki skim kiba wan na ka sorkar jylla bad ruh na ka sorkar pdeng, ki la pynpaw ruh ïa ki jingeh ha kaba pyntrei ïa ki skim bad ha kajuh ka por ki la pynpaw bad pynshai ruh ïa ki jingmyntoi jong ki nongshong shnong haba pyntreikam ïa ki skim.
Ki tnat sorkar kiba la wan sha kane ka jingialang ki kynthup ka tnat PHE, PWD, Water Resources, Health & Family Welfare, Soil & Water Conservation, Agriculture, Horticulture, Fisheries, Education, Border Areas Development, Tourism, DRDA bad kiwei kiwei bad la ïa kren bad iatai halor ki skim ba kynthup ka skim MNREGS, PMAY-G, NSAP, SRWP, NRLM, JJM, PMKSY, PMJAY& MHIS, CM’s Safe Motherhood Scheme (CM-SMS), CM’s Social Assistance Scheme (CM-SAS), State Rice Mission, CM FARM+, CM Elevate, PM-ABHIM, Meghalaya State Aquaculture Mission (MSAM), PMMSY, SSA, PM-POSHAN, ICDS, PDS, Swachh Bharat Mission- Gramin, PMEGP, PM Vishwakarma bad kiwei kiwei.
Ka Chairperson, Assembly Committee on Women Empowerment kaba dei ruh ka MLA jong ka Sutnga-Saipung, ka kong Santa Mary Shylla kaba dei ruh ha kajuh ka por ka Chairperson, DPDC, East Jaiñtia Hills District ka la ai ka jingiaroh ïa ki heh sorlar jong ki tnat bapher bapher kiba la ïa poi sha kane ka jingïalang ha kaba ki la pynpaw bad pynsngew ïa ka jingkiew ha ki kam lyngba ka jingpyntrei ïa ki skim bapher bapher, namar ka jingpyntei ïa ki skim ka don ka thong ban wanrah ïa ka roi ka kiew hapoh ka district bad ruh na ka bynta ka jingbit jingbiang ki paidbah nongshong shnong, ka kong Santa Mary Shylla ka la kular ruh ba kan ai ka jingkyrshan ïa ki tnat sorkar da kaba kan ialeh katba lah ban wanrah ïa ki project bapher bapher hapoh ka district.
Kiba la ïa don ryngkat ha kane ka jingïalang ki kynthup ruh u Deputy Commissioner, East Jaiñtia Hills District, u Shivansh Awasthi, IAS, ka MDC jong ka Rymbai- Khliehriat, ka kong Violet Lyngdoh, u Additional Deputy Commissioner & Member Secretary, DPDC, East Jaintia Hills District, u S.R Marak, MCS lem bad ki heh sorkar kiba na ki tnat bapher bapher.