Nongpoh, Jylliew 09: U Deputy Commissioner (Supply), Ri-Bhoi District U la pyntip paidbah ba ïa u khaw AAY, PHH bad NON-NFSA naka bynta u bnai Jylliew, 2023 la pyllait sha baroh ki dukan rashon (Fair Price Shop) hapoh Ri-Bhoi District. Ka jingsam ïa kine ki khaw ka long, u khaw AAY-35kilo shi ïing tang ïa kiba don ka Card AAY, u khaw PHH 5kilo shi khlieh briew bad u khaw Non-NFSA 7.215 kilo shi ïing na ka bynta ki longing kiba don ïa ka Card Non-NFSA ha ka dor T.10.82p shi kilo.
Kito ki longing ki bym don ïa ka Card rashon lane kiba la kum pynjah ïaki Card AAY, PHH hynrei kiba don kyrteng pat ba la ai da ka ophis sha ki Fair Price Shop Dealer ki lah ban shim ïa ka bhah kaba la mang ïaki.
Baroh ki wholesaler ki dei ban pynpoi ïa u khaw sha ki dukan jong ki Fair Price Shop Dealer katkum ka Section 24 jong ka National Food Security Act, 2013 bad lada lap ne don ki wholesaler ne ki Fair Price Shop Dealer kiba shim pisa ne pynduna jingthew kin shah pynshitom katkum ka Section 7 jong ka Essential Commodities Act, 1955 bad katkum ka Section 3 jong ka Preventive of Black Marketing and Maintenance of Supplies of Essential Commodities Act, 1980. Kumjuh ruh la bthah ïa baroh ki Fair Price Shop Dealer ba ki dei ban pyndonkam da ka e-POS Machine.
