Jowai: Da ki phew hajar tuid ki paidbah bad ki paidriewngeit na kylleng ki Parish ka Jowai Diocese bad nabar ka Diocese sha shnong Sanaro sha ka jingpynkyntang Lyngdohsohblei ïa u Dikon Richard Shylla. U Dikon Richard Shylla u dei u khun jong u ma (L) Stephan Dhar bad ka kong Glory Shylla kiba shong basah ha shnong Sanaro kaba hap hapoh ka Shnat niam Parish Namdong West Jaintia Hills District. U dei u khun khatduh na ki hynñiew ngut shipara. U wan na ka longïing longsem kaba duna ka ïoh ka kot.
Hadien ka jingpule kaba bun snem bad da ka jingjied jong u Blei mynta ka sngi 11 tarik Kylla-lyngkot 2026, la pynkyntang Lyngdohsohblei ïa u da u Most.Rev.Ferdinand Dkhar dd, Bishop jong ka Jylla niam (Diocese)Jowai. Kane ka jingpynkyntang Lyngdohsohblei ïa u Richard Shylla ka la pynpura ïa ka jingangnud jong u (Richard Shylla) ha ka ban shakri ïa U Blei bad ïala ki parabriew. U Lyngdohsohblei Richard Shylla u dei u Lyngdohsohblei uba nyngkong eh ba ka “BLESSED JOSEPH NARDINI SEMINARY UMMULONG KA LA PYNMIH” bad u Lyngdohsohblei uba ar ba ka Balang shnong Sanaro ka la pynmih bad uba lai na ka Parish Namdong.
Ha ka por 10 baje mynstep la pynlong ïa ka jingkñia Mass Iukharist ba la lamkmat da u Most Rev. Ferdinand bad ka jingpynkyntang Lyngdohsohblei ïa u Dikon Richard Shylla ha ryngkat ka jingsynranlang jong ki 31 ngut ki Lyngdohsohblei kiba la ïawan sakhilang ïa kane ka sngi ka bakhraw, ka sngi ka jingpynkyntang Lyngdohsohblei ïa u Dikon Richard Shylla na kylleng ka Jowai Diocese bad nabar.
U Bishop Ferdinand haba kren ha kane ka sngi u ong “Ka jinglong Lyngdohsohblei ka long ka jingjied da u Blei hi naba U Trai Jisu u la ong ym dei maphi kiba la jieid ïa nga, hynrei nga kein nga la jieid ïa phi bad nga la jied ïa phi ban leit bad ban pynmihsoh shibun—-(Io.15:16) Nangta U Bishop Ferdinand u ong “Ko Dikon baieid kumba U Jisu u lakhot ïa phi sha kane ka jinglong Lyngdohsohblei, la khot ïa phi sha ka kam Mission jong U ban shakri bad ban ai la ka jingim ban siewspah ïa kiba bun”(Mk.10:45)
U Bishop Ferdinand ha ka sneng ka kraw ïa u Lyngdohsohblei uba thymmai u ong “U lyngdohsohblei u long u Nongiatreilang babitdor jong u Lyngdohsad (Bishop) ha kaba sumar bad bsa ïa ki kynhun ‘langbrot jong U Blei hapoh ka jingïalam jong u Mynsiem bakhuid, u Nongpynphriang ïa ka ktien U Blei da kaba ïalap ïa ka Khuboir babha bad ban hikai bniah ïa ka jingngeit Katholik bad ka jingkiew irat ki paid-khristan ha ka jingim blei, ka jingknia Iukharist, ka Sakrament jingpyniasuk bad kiwei de kat kum ka jinghikai pateng jong ka Balang bad u pynkut ïa ka jingkren da kaba ong ba ka kam jinglonglyngdoh sohblei ka dei ka kam shakri ïa U Blei bad ïala ki para briew bad ka jingaiti ïalade ha U Blei da ka mynsiem sngewrit bad dem hakhmat u Blei.
