Shillong, Risaw 09: Ka jingïalehkai jong ka lympung Shillong Premier League 2025 hapdeng ka Rangdajied United bad ka Mawlai ha madan First Ground-SSA Stadium, Polo, la hap ban pynkynriah noh namar ka jinglong jingman ka suiñbneng.
Ka jingjur jong u slap ka la pynlong ïa ka madan ban lang um bad ki nongpynïaid jong baroh ar tylli ki klob ki la mynjur ban pynsangeh noh ïa ka jingïalehkai na ka bynta ka jingmyntoi jong ki rangïalehkai.
Ha ka jingshisha, kane ka la dei ban long ka jingïalehkai kaba nyngkong eh ban sdang ïa ka kylla kaba phra (Round 8) bad ka samoi ka la jam mynta sha ka wat ïakhun kaba kongsan tam. Ka Mawlai ka don ha ka kyrdan kaba ar hadien ka Shillong Lajong kaba bat ïa ka nam lahduh, bad ka dang ïakhun ban ïoh ïa ka nam lahduh, katba ka Rangdajied pat ka dang ïakhun ban ïoh jaka ha ka thup kyrdan Top 6 la kumno kumno khnang ban ïoh rung sha ka SSA Super Cup kaba thymmai kaban sa bud hadien ka SPL.
Na ka liang jong ka Shillong Sports Association, kaba pynïaid ïa ka SPL, kin sa pyntip ïa ka tarik kaba thymmai na ka bynta kane ka jingïalehkai hapdeng kine ki arliang mamla.
Ka jingïalehkai kaba la buh por ha kane ka sngi Thohdieng, 10 tarik Risaw 2025, yn ïohi ïa ka Langsning, kaba wan ha ka kyrdan kaba lai, kan ïakhun pyrshah ïa ka Laitkor ha ka por 4:30 baje janmiet.
Na bynta ka Langsning, ka jingjop pyrshah ïa ka Laitkor kan long kaba donkam ban dang pynsah ïalade ha ka jingïakhun ïaknieh nam lahduh, hynrei ka jingkyrmen ka kham duna lada ïanujor bad ka Lajong bad ka Mawlai. Katba ka Laitkor kaba don ha ka kyrdan kaba hynñiew, kan sa kiew sha ka kyrdan kaba san lada ka jop hynrei ka dang hap ruh ban husiar bha ïalade namar ba ka jingshah pynhiar kyrdan ka dang lah ban jia lada kim lah ban ïoh ïa ki resol kiba bha ha ki ar tylli ki jingïalehkai ba khatduh jong kane ka samoi.
