La pynkut noh ïa ka lympung phutbol jong ka Synjuk Sordar Nongthliew Area, lahduh ka Dong Kurbah Mawlyngdep

nongthliew, Nailur 14: Ka Synjuk Sordar Nongthliew Area ka la ïoh ban pynkut noh ïa ka lympung phutbol ha ka sngi Saitjaiñ (13 Nailur, 2025) ha kaba ka kynhun ïalehkai jong ka Dong Kurbah Mawlyngdep ka la ïohrah ïa ka nam lahduh.
Kane ka jingjop jong ka Dong Kurbah Mawlyngdep ka la wan hadien ba ka la lah ban pynliem ïa ka Umthlong ha ka jingïakhun ïa ka final lyngba ka tiebreaker da 4-1 hadien ba ka jingïalehkai ka la kut ha ka jingïakhaid da mar 1-1 kol.
Kum ka lahduh, ka Dong Kurbah Mawlyngdep ka la ïoh khur ïa ka song pisa kaba T.20 hajar, katba ka Umthlong kaba la wan ha ka kyrdan ba ar ka la ïohpdiang ïa ka song pisa kaba T.10 hajar.
Ha kane ka sngi pynhap pyrda la wan kongsan da u Benet Wanphang Mawlong, ha ryngkat u Bah P Syiemlieh, Syiem Hima Nongkhlaw kum u symbud kongsan. Kiba la donlang ha kane ka sngi pynhap pyrda ki kynthup ïa ki sordar na ka shnong bapher bapher jong ka Area Nongthliew.
Nalor ki khusnam sha ka kynhun lahduh ki la don ruh ki khusnam sha ki rangïalehkai ba kynsai, ha kaba ïa ka nam Best goalkeeper la khur da u Deringstar Kurbah, nangta ïa ka nam Player of the tournament la khur da u Namkyrpang Mawlong, katba ïa ka khusnam Top scorer la khur da u Siewdorpura Nongrang.
Ha kane ka sngi la ïoh ruh ban pynkup burom ïa ki nongïalehkai kiba wan rah nam ïa ka district kumjuh ïa ka jylla hi baroh kawei:
Kine ki kynthup ïa ar ngut ki nongïakop mareh ba pawnam jong ka thaiñ, ka Balasiewdor bad ka Glorify kurbah. Nangta Sharailang Basaiawmoit (ha ka cycling), u Imimstar mawlong (Best Youngest Player SSA 2024.
La pynkup burom ruh ïa ka samla Pynbhashisha Nongbri kaba la wan ha ka thup Top-20 ha exam hsslc ha u snem 2024.