Shillong, Nailur 26: Ka Sein Khynroo Khyllood Katholik Jowai Diocese Shillong Unit ha ka sngi U Blei ka la pynhap pyrda ïa ka jingrakhe ïa ka lyngkhuh snem ba 25 jong ka jingsdang jong ka. Ïa kane ka jingpynhap pyrda da ka nguh ka dem Blei kaba la pynmynta da u Sohblei Manbha Pakem u Director Youth Diocesan Jowai Diocese.
Ïa kane ka jingrakhe ba 25 snem ka SKKKJD, Shillong Unit la pynlong ha Don Bosco Hall, DBTS Laitumkhrah ha kaba u Sohblei Manbha Pakem u la long kum kongsan ha ka jingïadon lang U Spiritual Director ka Sein Khynroo Khyllood U Sohblei Festus Shadap bad kiwei pat ki Lyngdoh Sohblei kiba la wan shim bynta ki khun samla Ka Sein Khynroo Khyllood kiba shong ba sah ha Shillong ha ka jingïalang U President Samla Pascal Lyngdoh ki la shim bynta ïa ka lehkmen Jubilee Rupa.
Ha shwa ban sdang Jingkñia Mass u Ma Bestarwel Dkhar nongmih bujli ha ka jaka u Ma Kyrmen Shylla u la pynher ïa ka Lama jubilee bad ka jingrwai Anthem ka Sein Khynroo Khyllood Katholik Jowai Diocese Shillong Unit.
Ka Sein Khynroo Khyllood Katholik Jowai Diocese Shillong Unit ka dei ka Seng jong Ki samla Katholik na Rilum Jaintia kaba kdup ba lum kiba im basah ha Shillong. Ïa kane ka seng la seng nongrim ha u snem 1997 da ka jingthmu ban tehsong ïa ki paid samla kiba im ba trei bad ba wan pule ha Shillong.
Shuh shuh kane ka jingrakhe Jubilee Rupa la don lang ki nongïalam barim ka seng bad la ïoh ruh ban pyllait paidbah ïa ka thup sah kynmaw ba la pyllait da u Sohblei Manbha Pakem.
