Jowai, Nohprah 16 : Ka Government Girls’ Higher Secondary School, Jowai mynta ka sngi 15 tarik u Nohprah 2025 kala pynkut ïa ka jingrakhe dap 50 snem ne ka Jubili Ksiar, haka jingïalang ba la pynlong ha phyllaw jong ka skul hi.
Ha kane ka sngi pynkut la wan ban donlang naduh u Myntri ka tnat pule puthi ka jylla u ma Lahkmen Rymbui kum u Kongsan, ha ryngkat u Myntri ka tnat ka koit ka khiah bad ka kam ïalehkai Sports u ma Wailadmiki Shylla, u bah B. J Kharshandi (MCS), ka Principal Co-ordinator Jubilee Celebration Core Committee & District School Education Officer, WJHs ka Dr. Wa -i-sa Sumer, u Principal Government Girls HSS u K. Syiemlieh, nalor kiwei de.
U kongsan ma Lahkmen Rymbui ula kren halor ka jingmut jong ka motto ka skul kaba ong “Think Act Flourish” bad ula kyntu ïa ki khynnah skul ban shim ïa ka nongrim ba bha haduh ban poi haka thong jong ka jingjop.
Shuh shuh u myntri ula pynsngew ba ka sorkar kala ïaleh ban pynkhlaiñ ïaka tnad pule puthi ka jylla, da kaba kdew ïa ka jingpynkiew kyrdan dang shen ïa ki katto katne tylli ki skul hapoh ka jylla naka Secondary sha ka kyrdan Higher Secondary na ka bynta ka jingmyntoi jong ki samla pule.
Ban pynbha shuh shuh ïaka kam hikai ula pyntip ba ka sorkar kala dep ban thaw ïa ka Meghalaya Teachers Training Academy, da kaba pynbna ba ka Bharat Petroleum India kan bei pisa haduh 20 lak ban tei ïa ki kamra klas thymmai ha Government Boys’ Higher Secondary School, Jowai.
U ma Wailadmiki Shylla, haba kren sha ki samla pule ula pynsngew ba ka sorkar kala buh hakhmat eh ïaka pule puthi, ula ïaroh kumjuh ïa u myntri ka pule puthi ula la trei shitom lyngba kane ka tnad ban pynïoh jingïarap pisa sha ki skul, ka jingpynbha ïa ki jingtei bad ka rukom pynrung kam nonghikai haka por kaba biang.
Haba phai sha ka jingnang jingstad jong ki kynthei mynta ki sngi u ma Wailad ula pynpaw ka jingsngew sarong ba ka jylla ka long kaba kheiñ kor bha ïaki kynthei katkum ka Riti dustur jong ka jaitbynriew kata ma ki ruh kin ïoh ka juh ka jingnang jingstad.Ula pynsngew ruh ïa ka memorandum bala aiti daka skul kata ban tei ïaka Auditorium Hall bad ki jingdonkam jong ka Girls’ Hostel.
La pynkut noh ïa kane ka jingrakhe Jubili Ksiar kaba shisnem lynter da kaba kitbok ïa ka lawei jong ka skul ba kan long kaba phyrnai.
