Jowai, Jylliew 07: Shi bynta na ka jingrakhe ïa ka taïew pynneh pynsah mariang ne ka ‘World Environment day’ na ka liang ka Meghalaya Basin Management Agency- CLLMP, Jowai ha ryngkat ka jingïatreilang bad ki bor pynïaid District jong ka West Jaiñtia Hills kila sdang ban rakhe naduh ka 2 tarik u Jylliew bad pynkut hynin ka sngi ha Community Hall Lion Mission Compound Jowai.
Hapoh kane ka taiew la leh shibun ki prokram da kaba pynlong ka jingthung tynrai dieng haduh 700 tylli kiba kynthup ha DC Quarter, ha ophis Municipal, ha North East Adventist University bad ha BDO Thadlaskeiñ ophis. La don ruh ka jingïakop dro dur bad ka jingthoh Essay halor ka phang ‘Only One Earth’-Living sustainability in harmony with Nature, la don ruh ka jingïakop ïatai ñia (Debate) halor ka phang “Urbanisation- A boon or Bane” ba la shim bynta da ki 20 tylli ki skul.
Haba ai jingkren ha kane ka sngi ka Block Development Officer (BDO) Thadlaskeiñ C&RD ka kong Baiantimon Blah (MCS) kaba long kum ka kongsan kala pynkynmaw ba ïa kane ka sngi la sdnag rakhe ïa ka ha ka 5th June 1972.
Kala batai ruh shaphang ka jinglong jingman jong ka mei mariang ha kine ki sngi ba mynta kiba la ktah shisha ïa ka pyrthei baroh kawei kata naduh ka jingkylla bad ka jingshit ka suiñ bneng ym tang ha ki jaka sor bah hynrei wat sha ki shnong nongkyndong ruh, kane ka jingshit palat kala wanrah ïa ka jingum jong ki thah (Glacier) kaba la wanrah ka jingkiew ka um ha duriaw bad kan ktah ïa ki dewlynglong, ka jingbun palat ki kharkhana, ki kali motor kiba la pynmih shuh shuh ïa ka jingjaboh jong ka mariang, ong ka kong Blah.
Kala kyntu kum ki nongshong shnong ba kidei ban don ka jingkit khlieh halade ban lait na kine ki jingeh kiba lah ban ktah ïa ka mei mariang, da kaba ka kyntu ba donkam ïa ka jingkylla da kaba pynduh noh ïa ka jingpyndonkam ïa ki pla plastic ha ka por ba leit ïew leit hat bad pyndonkam da u juh u klong umdih. Ha ka juh ka por ka kyntu ïa ki khynnah skul ba kin nang ban tyngkai bha ïa ka um ha ka por slap.
Ha kane ka sngi la sam ruh ïa ki khusnam sha ki nongjop ha ka jingïakop da ka kongsan ryngkat u symbud kongsan u Dolloi ka Elaka Jowai ma Puramon Kynjing bad u President ka Synjuk ki Waheh Shnong Jowai ma Alan Niangti, la don ruh ka jingshah tynrai ba la shim bynta da ki khun samla.
