La pynkhreh ka jylla ban pynlong ïa ka Cherry Blossom, khmih lynti ban bun kiba wan

Shillong, Risaw 31: U Myntri Rangbah ka jylla u Conrad K Sangma ha ka sngi Thohdieng u la pynbna ïa ka jingpynkhreh ka jylla ïa ka jingpynlong ïa ka Cherry Blossom Festival 2025, kaba la buh ban pynlong ha madan Polo ha ka 14 bad 15 tarik u Naiwieng.
Ha kane ka tamasa ki nongrwai ba pawnam jong ki ri ka pyrthei kiba kynthup Irish rock band The Script, R&B superstar Jason Derulo, 3-time Grammy winner DJ Diplo, pop icons Aqua, bad ka aktres Bollywood ka Nora Fatehi.
Ha kane ka tamasa kan don ruh ka jingai burom ïa u nongrwai ba paw u Zubeen Garg ha ka sngi kaba ar, ban tem da ki nongtem kiba don ka jingïadei kaba jan bha bad u, ba kynthup ïa Zublee, Priyanka, Prabin, bad Arupjyoti.
Ki nongrwai bad nongtem na ka jylla ki ban pynbyrnia ki kynthup ïa Meba Ofilia, Dappest and adL, rock band Girish bad Chronicles, bad Arius.
Ha kane ka tamasa kin don ki jingïakob riam tynrai kaba la tip da ka Mr and Ms Cherry Blossom, nangta ka cosplay, bad ka Cherry Blossom arm wrestling, ha ki jaka bapher bapher.
Ïa ki Ticket lah ban ïoh online bad ha box offices ha Shillong.
Haba kren sha ki lad pathai khubor u Myntri Rangbah u la pynpaw ka jingkmen da kaba ong, “Nga dap da ka jingkmen ban pynbna ïa ka jinglong ba la pynkhreh ïa ka Cherry Blossom Festival 2025. Kane ka tamasa mynta u snem ka kular ba kan long ka tamasa kaba heh naba kin don ki music, art, bad ka jingpyninam ïa ki riam tynrai kiba bapher kiba don ha kane ka jylla.”
Ka Shillong Cherry Blossom Festival ka la ïoh ka jingithuh da kaba ka la jop ïa ka Golden Banyan Award for Best Cultural Music & Dance at The Week Heritage Awards 2025 bad 2 tylli ki Gold Awards ha ka WOW Awards Asia 2025.
U Sangma u la khmih lynti ba kin don palat 50,000 ngut ki nongjngohkai ki ban shim bynta ha kane ka tamasa, da kaba ong, “Ngi kyrmen ba ngin lah ban tam 50,000 ngut ka jingwan kiba jngohkai kiba nabar ki ban sahmiet.”
Haba ïadei bad ka jingsngewkhia ka jingdheng kali, u Sangma u la ong, “Ka jingdheng kali kam dei tang ïa ka mynta, hynrei ka ladei kaba la neh mynta la 50 snem mynshwa. Ngin khang ïa ki jingïaid ki kali ha ki movement zone bad ngin ym shah ïa ki kali ban ïaid palat ka jaka ba la buh bad kan don ruh ka jingkhang kali kumba katto katne por.”
U la ong ba ka sorkar ka la pynlut ban shna ïa ki jaka ïeng kali, nalor ka jingdonkam ban pynduna ka jingdheng kali ha ka nongbah.