Shillong, Naiwieng 29: Ka prokram pynkut ïa ka International Film Festival of India (IFFI) 2025 ka la wanrah ïa ka jingrakhe ïa ka jingïar jong ka kolshor ha ka ri India, kaba wanrah lang ïa ki riti dustur, ka pateng tynrai, bad ka jingtbit ha ka kam saiñdur ha ka juk mynta ha ka pyrthei. Ïa kane ka jingpyni ïa ka kolshor mynta u snem la pynkhreh ban pyni ïa ka jingïar jong ka ri India baroh kawei, naduh ki jaka shyiap jong ka Rajasthan bad ki riti dustur jong ka Karnataka haduh ki kam ka put ka tem jong ka thaiñ shatei lammihngi bad ki sur jingrwai jong ka ri India kiba pynpaw ïa ka mynsiem jong ka Ek Bharat Shreshtha Bharat.
Ka mat ba kongsan tam jong kane ka jingïalang ka long ka jingpyni ïa ka kolshor jong ka thaiñ shatei lammihngi, kaba la pynïaid da u Ranjit Gogoi, kaba la pynpaw ïa kawei na ki jingpyni kaba ïar tam jong ka thaiñ ba la ïohi ha ka rynsan jong ka IFFI. Ïa ka bynta jong ka thaiñ shatei lammihngi la saiñdur kum ka jingpyni kaba ar bynta kaba rakhe ïa ka jingnoh synñiang jong ka thaiñ sha ka kam shna phlim jong ka India bad ka jinglong kyrpang jong ka kolshor jong ki 8 tylli ki jylla jong ka.
Ka bynta kaba nyngkong ka la wanrah ïa ka jingpyni ïa ka jingshad halor ki kam ba pawnam jong u Dr. Burman, u R.D. Burman, u Zubeen Garg, bad u Papon. Kane ka prokram ka la pynpaw ïa ka jingnoh synñiang ba kongsan jong ka thaiñ shatei lammihngi sha ka sur jingrwai ha phlim jong ka ri India.
Ka bynta kaba ar ka la pyni ïa ki jingrwai tynrai na baroh 8 tylli ki jylla jong ka thaiñ shatei lammihngi. Ka la kynthup ïa ka shad Nyapa bad Zya Cham na Arunachal Pradesh, Bihu na Assam, Shad Cheraw lane Bamboo Dance na Mizoram, Wangala na Meghalaya, Pung Cholom na Manipur, Sangrain jong ka Tripura, Warrior Dance na Nagaland, bad Singhi Chaam na Sikkim. Kane ka bynta ka pyni ïa ka jingrwai bad sur jingrwai jong ka thaiñ, ka jinglong kyrpang jong ka kolshor, kaba pynskhem ïa ka jingïatylli jong ka India lyngba ka jingïar jong ki kam saiñdur. Kane ka bynta ka la long kawei na ki bynta ba heh tam ban pyni ïa ka jinglong kyrpang ha kane ka prokram pynkut.
Ha ka jingïadonlang ki barikor na Rajasthan, Karnataka, Assam, Arunachal Pradesh, Mizoram, Tripura, Sikkim, Manipur, Nagaland, bad Meghalaya, ka prokram pynkut ka la long kum ka jingpyni kaba pura ha kawei na ki jaka pyni phlim ba pawnam ha ka pyrthei.
