Khliehriat, Nailar 07: Ka East Jaiñtia Hills District ka la ïoh ban pynhap pyrda noh ïa ka lympung ïalehkai phutbol kaba la tip da ka ‘Football Based Intervention Programme 2025’ kaba dei ka prokram kyrpang na ka bynta kito kiba samla kiba la ngop ha u drok kaba don ka ryngkat ka phang pdeng “Goal Beyond Addiction”.
ïa kane ka lympung kaba shi taïew lynter la sdang naduh ka 29 tarik u bnai Naitung bad la pynkut noh ha ka 07 tarik Nailar, 2025 jong ka sngi Palei ha madan futsal ha Khliehriat East.
Ïa kane ka tournament ba kyrpang la pynlong da ka ophis jong ka District Social Welfare Officer, East Jaiñtia Hills District ha ryngkat ka jingïatreilang bad ka ophis u Deputy Commissioner, ka East Jaiñtia Hills District, ka tnat Opioid Substitution Therapy (OST) Centre, Khliehriat bad la bei tyngka da ka District Mineral Foundation (DMF).
Ka jingthmu haba pynlong ïa kane ka prokram ka long ban wanrah lang ïa kito kiba la ngop ha u drok sha ka jingim kaba thymmai bad ban pynphai ïa ki sha ka jingim tipbriew tipBlei.
Ha kane ka sngi la wan Kongsan da ka MDC jong ka Rymbai-Khliehriat MDC, ka kong Violet Lyngdoh, ha kaba ka la ai khublei ïa ka ophis jong ka District Social Welfare Officer (DSWO), East Jaiñtia Hills District kaba la khot pynlong ïa kane ka prokram kaba long kum ka jingaijingpynshai ïa kito kiba la kyrni ha u drok da kaba pynpaw ba lyngba kane ka tournament kan pynlong ïa ka district kaba lait na u drok.
“Ym dei ban kynnoh ban kynthoh ïa kiba ngop ha u drok hynrei donkam ban ïatreilang ban pynbha pat ïa ki,” la ong ka kong Violet Lyngdoh.
Nalor ka kongsan kiba la ai jingkren ha kane ka sngi ki kynthup ruh ka District Social Welfare Officer (DSWO) East Jaintia Hills District, ka kong R.Bareh bad ïa ka prokram la pynïaid da ka Programme Manager, Mihmyntdu Community Social Welfare Association (MCSWA), kong R.Patlong. Ha kane ka prokram la ïa don ryngkat lang ruh u Waheh Shnong Khliehriat East, u bah Kedius Rymbai, ki khynnah skul, ki samla kiba la ngop ha u drok kiba la wan ban ïa shimbynta ha kane ka Futsal Footbal Tournament bad kiwei kiwei ki riew rangbah.
Ha kane ka prokram, ka kong R,Patlong ka la ialam ha ka jingshim ïa ki ktien jingkular ne ka pledge ban lait na u drok.
Hadien ka prokram ba la pynlong ha hall, la pylong ruh ïa ka jingïalehkai football ha madam futsal bad ka kong Violet Lyngdoh, u Sub-Divisional Officer (SDO)- Sadar, East Jaiñtia Hills District, u Manish Kumar, IAS bad ki riew rangbah ki la sam ïa ki trophies, ki takma ryngkat bad ki syrnot sha ki rang ïalehkai jong ki kynhun ba jop.
