La pynhap pyrda noh ïa ka 4th South West Khasi Hills District Chess C’ship 2025

Mawkyrwat, Jymmang 19, 2025: Ka South West Khasi Hills District Chess Association (SWKHDCA) hadien ba ka la ïoh ban pyndep ïa ka jingpynïalehkai ïa ki ar tylli ki bynta kaba dei jong ki khynnah skul (Students Category) bad ha ka open category jong ki shynrang bad kynthei, ka la ïoh ban pynhap pyrda noh ha kaba u bah Renikton Lyngdoh Tongkhar, MLA ka Mawkyrwat Constituency u la long kum u kongsan.
Lah ban kdew ba ïa kane ka 4th South West Khasi Hills District Chess Championship 2025 la dep ban pynlong ha ka hall jong ka Maharam Government Higher Secondary School Mawkyrwat ha kaba haduh 79 ngut ki nongïashimbynta ki la wan ban mihkhmat.
Ka jingthmu ba kongsan jong ka jingpynlong ïa kane ka jingïakop ka long ban jied ïa ki ‘rang bad ki ‘thei ïalehkai chess jong ka South West Khasi Hills District ba kin sa leit ban mihkhmat sha ka State Level ka ban sa long ha u bnai Jylliew.
Ha kaba kut jong ka jingïalehkai, na ka liang ka association ka la ïoh ban sam ïa ki khusnam sha baroh ki nongjop ha kane ka 4th South West Khasi Hills District Chess Championship 2025 kiba kynthup ïa u Eidenson Marweiñ na ka Little Star Higher Secondary School, Mawkyrwat, ba ar u Mendaker Kharjahrin na ka Maharam Govt. Higher Secondary School, Mawkyrwat bad ba lai dei u Glisterwell Marweiñ na ka Little Star Higher Secondary School, Mawkyrwat jong ki khynnah shynrang (Students Category Male)
Katba jong ki khynnah kynthei (Students Category Female) ki long ka Haphilabuhti Nongsiej na ka Nativity Higher Secondary School, Mawkyrwat ha ka kyrdan ba nyngkong, ka Carefulness Iawphniaw na ka Mawkyrwat Presbyterian Secondary School, Mawkyrwat ha ka kyrdan ba ar bad ka Ibansyrpai Iawphniaw na ka Little Star Higher Secondary School, Mawkyrwat ha ka kyrdan ba lai.
Nangta, ki nongjop kaba dei ha ka Open Category Male ne jong ki shynrang ki long u Banpyntngenlang Kharaswai ba nyngkong bad u Jefferson Marngar ba wan ba ar ki dei na na Mawkyrwat bad ba lai dei u Pyniarbor Jyrwa na Jakrem. Shuh shuh ki nongjop ha ka Open Category Female ne jong ki kynthei pat ki long ka Amity Marwein na Mawlangwir ha ka kyrdan ba nyngkong bad ka Wanranisha Syiemlieh na Jakrem CMYC ha ka kyrdan ba ar.
Kiwei de kiba la ïadonlang ki long u bah K.M. Warjri, President jong ka Meghalaya Chess Association, u bah Toteiham Lyngdoh Marshilong, President South West Khasi Hills District Chess Association lem bad kiwei de.