Jowai, Nohprah 18: Ka Seng Samla Khlachympa Sports and Cultural Club Nongtalang hynnin ka sngi 17 tarik u Nohprah kala pynhap pyrda noh ïa ka 8th Inter-dong Football Tournament-2025, ki kynhun kiba ïaknieh ïa ka nam lahduh ki long hapdeng ka New Nonglamin Sport Club pyrshah ïa ka Banan Sport Club haka por shi baje nohphai sngi ha madan Nongtalang.
Ha ka jingïakhun ka New Nonglamin SC kala pynliem ïaka Banan SC da 1-0 kol bad rah syndon ïaka nam lahduh (Champion) mynta u snem. Ïa kane ka shi kol la ïoh ban thep da u Tariang Lyngdoh.
Ka jingïalehkai kala long kaba itynnad shisha bad pynhun ïa ki nongpeitkai, wat la ki rangïalehkai jong ka Banan SC kila pyrshah ban thaw ki lad ki lynti ban ïoh thep kol hynrei haduh bala kut kim shym ïoh lad na ka jingkhanglad bad jingtbit jong ki rangïalehkai ka New Nonglamin SC.
Ïa ka Namtam (Man of the match) la ïoh rah da u Tariang Lyngdoh naka New Nonglamin SC, ïa ka best goalkeeper la ïoh rah da u Requelme Padu jong ka New Nonglamin SC, ïaka best player of the Tournament la ïoh rah da u Sagor Hajong jong ka New Nonglamin SC, ïa ka best top scorer la ïoh da u Wanbor Lakachiang jong ka Chnongthmai SC, ïa ka khusnam senior most player la ïoh da u Peter Pohchen jong ka Amlariang SC bad ïaka Discipline Team la ïoh khur da ka Amlariang SC.
Ha kane ka 8th Inter-dong mynta ka kynti la wan ban pynhap pyrda ïa ka, da u bah Nibaron Khongbinan, Vice-President NPP Pynursla Block kum u kongsan, haka jingïadon lang u Local MDC ka War-Central Constituency u bah Jamshaphrang Pohtam kum u symbud lem bad ka jingïadon ryngkat lang u bah Sanjeev Kongwang u Rangbah Shnong ka Umsyiem, East Khasi Hills, u ma Ferdinand Mukhim General Secretary jong ka Nongtalang Khlachympa bad kiwei kiwei de ki riew rangbah.
Ha kane ka sngi la wan ban pynshit pynsyaid ïa kane ka jingïakhun daka jingrwai naka samla Abigail Lyngdoh Talang.
