Jowai, Lber 01: Ka lympung ïalehkai phutbol bala pynïaid daka Dorbar Shnong Khonglah kaba la tip kum ka 2nd Invitation Football Tournament, kala poi noh sha kaba kut jong ka jingïakhun phainal ha kane ka 26 tarik u Rymphang ha Shnong Khonglah kaba hap hapoh ka Amlarem Sub-Division, West Jaiñtia Hills District.
La pynlong ïa kane ka lumpung ïalehkai phutbol kum ka lad ban ïarap pisa ïaka Khonglah Secondary School bad ka jingïakhun phainal kala long hapdeng ka Pra I Football Club pyrshah ïaka Amshipai Football Club, ha kaba ka Pra I Football Club kala jop da 4-0 kol.
Ha kane ka sngi u ma Kampher Pohlong, Waheh Shnong Amlarem bad u Secretary ka Synjuk Ki Waheh Shnong War Jaiñtia ula long kum u Kongsan, kiwei de kiba donlang ki kynthup ïa u ma C. Khonglah, Principal ka Khonglah Secondary School, ki Waheh Shnong barim, ki nonghikai, ki Contractor ka thaiñ, ki dkhot jong ka Dorbar Shnong bad ki paidbha nongshong shnong.
Haka jingkren u Kongsan ula ai khublei lang ïa baroh bad pynpaw ka jingsngewkmen ban wan pynhap pyrda ïa kane ka Football Tournament na ka bynta ban ïoh kyrshan pisa ïa ka Khonglah Secondary School.
Shuh shuh ula kitbok ïa ka skul ba kan dang ïai kiew shaphrang ha baroh ki liang khamtam haka liang ka pule ka puthi, da kaba pyntip ba un dang ïai bteng ban ïatreilang bad ka Shnong na ka bynta ki jingdonkam jong katei ka skul.
La sam ruh ïa ka khusnam sha ki nongjop katba ïa ka nam Top Scorer la ïoh da u Wanbor Langshiang, Best Goal Keeper da u Nangbun Surong bad ka nam Player of the Tournament la ïoh da u Marshial Nongrum.
